आम्दानी बह्रैना आन्तरिक स्रोत पहिचानमे जोड

पहुरा समाचारदाता
हसुलिया, १२ असार । कैलारी गाउँपालिकाके आर्थिक बर्ष २०७९÷२०८० गाउँसभा (बर्षे÷बजेट) अधिवेशनके मंगरके दुसर बैठकमे १५ जाने जनप्रतिनिधिहुक्रे विशेष समय लेके प्रस्तुत नीति कार्यक्रम तथा बजेटबारे अपन धारणा रख्ले बटै ।

गाउँपालिका अध्यक्ष राजसमझ चौधरीके अध्यक्षतामे हुइल बैठकमे बोलुइया गाउँसभा सदस्यहुक्रे पालिकामे बजेट कम रहल मने जनआपेक्ष अनुसार काम करेक लाग आन्तरिक आम्दानी बह्राई पर्नामे जोड डेहल रहिट ।

गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम पालिकामे ताल तलैया प्रसस्त मात्रमे रहल ओरसे सक्कु ताल तलैयाहे पालिका मतहातमे नाने पर्ना आवश्यक रहल बटैलै । उहाँ कहलै, ताल तलैयाहे ठेक्का डेके पालिकाके आन्तरिक आम्दानी बह्राई पर्ना जरुरी बा । गाउँपालिका बाढ प्रभावित क्षेत्र रहल ओरसे किसानके पिरमर्का बुझके आधा मालपोत घटाइल बा । उ कर घटाईबेर पालिकाके आन्तरिक आम्दानीके स्रोत करिब डेढ करोड घटल बा । नीति कार्यक्रममे समावेश हुइल योजना कार्यान्वयनमे नानेक लाग जनप्रतिनिधि ओ कर्मचारीके सम्बन्ध प्रगढ हुई पर्ना उहाँ बटैलै ।

वडा नम्बर ३ के वडा अध्यक्ष सन्तराम चौधरी सामाजिक सुरक्षा भत्ता घरघर जाके वितरण करेपर्नामे जोड डेलै । उहाँ कहलै, पालिकासे वडा स्तरमे डेना कामके सुरुवाट करल मने पूर्ण रुपसे लागु हुई नइसेकल कारण बैंकमे बृद्धबृढासे लाइन बैठे पर्ना बाध्य हुइल बटैलै । गाउँपालिकासे गर्भवती सुत्केरीहुकनहे निशुल्क एम्बुलेन्सके व्यवस्था कैना कहल बा । मने स्वास्थ्य चौकीके सिफारिस अनिवार्य रहल बा ।

वडा नम्बर ६ के वडा अध्यक्ष प्रेमबहादुर चौधरी पालिकाके सिमित बजेट रहल कारण जनआपेक्ष अनुसार काम करे नइसेकल बटैलै । उहाँ कहलै, जनताके माग ढेर बा । मने बजेटके कमी हुइल कारण एक ओर पुगाईबेर दुसरओर छुटन करल बा । आन्तरिक आम्दानी बह्राईक लाग स्रोतके खोजी करेपर्ना जरुरी रहल बा । वडा नम्बर ६ मे रहल ताल तलैयाके आम्दानीके स्रोतसे विकासमे खर्च करल उहाँ बटैलै ।

वडा नम्बर ४ के वडा अध्यक्ष ठागुराम चौधरी भर्खर सार्वजनिक करल नीति कार्यक्रम सक्कु वर्ग जातिहे समेटल बटैलै । उहाँ कहलै, आघेक करल कामके मुल्यांकन करटी यिहीहे कार्यान्वयन ओर लैजैना जरुरी बा । आन्तरिक आम्दानी बह्राई सेक्ना टमान स्रोत बा । उहीहे पहिचान करके आघे बह्रना जरुरी बा । उहाँ यूवाहे स्वरोजगार बनैना ओर लागे पर्नाफे बटैलै । फुलवारी के गाउँ जोरना घुरहा पुल जिर्ण अवस्थामे रहल ओरसे मर्मतके लाग प्रदेश ओ संघसे पहल कैना उहाँ आग्रह करलै ।

वडा नम्बर १ के वडा अध्यक्ष धोजहरिपाल बोहरा हसुलिया बजार डुबानके चपेटा परल कहटी ढल निकासमे जोड डेलै । कैलारीमे बसोबास करुइया ९५ प्रतिशत कृषिमे निर्भर रहल कहटी यहाँके किसान पैसा तिरकेफे मल नइपाइल बटैलै ।
वडा नम्बर २ वडा अध्यक्ष विकास चौधरी पालिकासे नानल नीति तथा कार्यक्रम मजा रहल बटैटी कार्यान्वयनमे जोड डेहल रहिट । यी पालिकाबासी कृषिमे निर्भर रहल ओरसे कृषि विद्युतिकरणमे जोड डेलै । पालिकाके विकास करेक लाग आम्दानीके खोजी कैनाफे उहाँ बटैले रहिट ।

वडा नम्बर ८ वडा अध्यक्ष तारामल कठरिया स्वास्थ्य विमाके रकम कम हुइल, कृषिके बजेट कम रहल बटैलै । यहाँ रहल ताल तलैया पालिकाके मतहतमे नइअइलेसे पालिकासे डेना सेवा सुविधा रोके पर्ना बटैलै ।

कार्यपालिका सदस्य लालबहादुर विक सार्वजनिक डगरमे रहल पोलमे सडक बत्ती जडान करे पर्ना, विद्यालय व्यवस्थापन समितिहे जागरुक बनाई पर्ना बाट राखल रहिट ।

कार्यपालिका सदस्य मनिराम कुमाल अल्पसंख्यक कुमाल समुदाय माटीके भाडा बनाके गुजारा करटी रहल ओरसे माटी मुछना मेसिनके व्यवस्था करेपर्नामे जोड डेहल रहिट । कुमाल समुदायके लर्कनहे कक्षा १० सम निशुल्क शिक्षा ओ जलमसे पाँच बरस समके लर्कनहे पोषण भत्ताके व्यवस्था कैना बाटमे जोड डेहल रहिट ।

वडा सदस्य मोहनलाल चौधरी सुत्करी गर्भवतीहुकनहे निशुल्क एम्बुलेन्सके व्यवस्था करल मने कबु कबु गुनासा आइल बटैलै । विकासके लाग उहाँ सुशासनहेफे जोड डेहल रहिट ।

वडा सदस्य माघुराम चौधरी जनप्रतिनिधिहुकनहे क्षमता विकास तालिम डेहे पर्नामे जोड डेहल रहिट । उहाँ वडा सदस्य सेवासे बञ्चित हुइल आरसे सेवा सुविधामे ध्यान डेना आग्रह करल रहिट ।

वडा सदस्य सुवा परियार संघसंस्थासे पालिकामे लागु हुइना कार्यक्रममे सहभागिता नइकराइल, दलित समुदायके लाग छुटयाइल बजेट कम रहल, घुरहा पुलके मर्मत करे पर्ना, सामाजिक सुरुक्षा भत्ता वितरण सक्कु वडास्तरमे पुगे नइसेकल बाट राखल रहिट ।

वडा सदस्य आशिक चौधरी यूवाके लाग छुटयाइल बजेट कम रहल बटैलै । वडा सदस्य सैतुराम चौधरी ऐलानी प्रतिरहल किसान सेवा सविधासे बन्चित हुई परल, मोहना पारीके तीन गाउँ बाढ, डुबान, पटान ओ कटानके समस्या झेल्टी आइल बटैलै ।
वडा सदस्य तुल्सी प्रसाद चौधरी बजेट कार्यान्वयनमे टमान टिकाटिप्पनी आइल ओरसे सुझावहे मनन कैके जैना आग्रह करलै । सामाजिक सुरक्षा भत्ताफे घर घर बँटना कहल मने बैंकसे आटेरी करल, शिक्षामे टमान बहनामे शुल्क लेटी रहल बाट बटैलै ।
दुसरा बैठकमे आइल सुझावहे गाउँपालिका अध्यक्ष राजसमझ चौधरी विषययगत समितिसे समन्वय करटी आघे बह्रना बटैलै । ओस्टेक सभाके औरे बैठक यिहे असार १७ गते विहान ११ बजे बैठना उहाँ जनैलै । बैठकमे उपाध्यक्ष भगवतीकुमारी चाौधरी, प्रमुख प्रशासकीय अधिकृत विरबहादुर ऐर, सामाजिक विकास शाखा प्रमुख यगम कलेललगायत टमान शाखाके प्रमुखहुकनके सहभागिता रहे ।