कैलारीमे कुष्ठरोग विरुद्धके औषधी खवैना अभियान सुरु

पहुरा समाचारदाता
हसुलिया, १३ असार । कैलालीके कैलारी गाउँपालिकामे चालु आर्थिक बर्षमे ८ जाने लौव कृष्ठरोगी डेखलपाछे आजसे वडा नम्बर १ मे कुष्ठरोग निवरणके लाग औषधी खवैना अभियानके सुरुवाट हुइल बा ।

कुष्ठरोग २०६८ सालमे निवारण हुसेकलेसेफे कैलारीमे फेरसे लौवा रोगी डेखलपाछे समावेशी विकास कार्यक्रम अन्तरगत कृष्ठरोग निवारणके लाग औषधी खवैना अभियानके सुरुवाट कैगिल हो ।

कैलारी गाउँपालिका समन्वयमे नेपाल राष्ट्रिय समाज कल्याण संघ कञ्चनपुर ओ नेदरल्याण्ड लेप्रोसी रिलिफके आयोजनामे कुष्ठरोगी डेखल ठाउँमे औषधी खवाई लागल बा । औषधी खवैना अभियानके उदघाटन कार्यक्रममे गाउँपालिका अध्यक्ष राजसमझ चौधरी निवारण हुइल रोग फेरसे विल्गाइलपाछे खतराके संकेत डेखल बटैलै । उहाँ कहलै, कुष्ठरोग सरुवा रोग हो । यिहीहे बाँचेक लाग आव सचेत हुइना जरुरी बा । अभियानहे सफल बनाइक लाग स्वास्थ्य स्वयं सेविका, भल्मन्सालगायतके सक्रिय सहभागिताके आवश्यकता रहल उहाँ बटैलै ।

गाउँपालिका उपाध्यक्ष भगवतीकुमारी चौधरी कुष्ठरोगहे पहिलेक जलमके पाप, कोरही हुइल आरोप लगाजैटी रहल बटैली । उहाँ कहली, यी रोग लागल मनैनहे घरसे बाहेर धारजाए । घृणा करजैना करल रहे । रोगलागलपाछे नम्मा समय औषधी खाई पर्ना अवस्था रहे । अब्बे औषधी आसेकल ओरसे अपने, अपन परिवार, समाज छिमेकीहुकनहे बचाइक लाग औषधी खैना जरुरी रहल बा ।

नेपाल राष्ट्रिय समाज कल्याण संघ कञ्चनपुरके निर्देशक अशोक विक्रम जैरु कुष्ठरोग विरुद्धके एक ठो औषधी सेवनसे अपने परिवारहे बचाई सेक्ना बटैलै । यी अभियानहे सफल बनैटी पालिकाहे रोग मुक्त पालिका बनैनामे सक्कु जानेक सहयोग समन्वय जरुरी रहल बटैलै । अभियान कार्यक्रममे नेदरल्याण्ड लेप्रोसी रिलिफके प्रकाश मल्ल यी पालिकामे सक्कु वडामे औषधी खवैनाके सुरुवाट कैना बटैलै । कैलारी गाउँपालिका २०५४ सालसे अब्बे ३ सय ६९ जनहने यी रोग डेखसेकल बटैलै । उहाँ कहलै, रोग डेखल सक्कु औषधी खासेकल बटै । मने चालु आर्थिक बर्षमे ८ जाने लौव विमारी डेखल बटै । ओम्नेसे १ जाने १४ बरस टरेक व्यक्तिमे डेखल ओरसे खतराके संकेत डेखल बा ।’ छोट मनैनमे डेखा पर्ना कहल रोग सरटी रहल संकेत रहल उहाँ बटैलै ।

नेपाल राष्ट्रिय समाज कल्याण संघ कञ्चनपुरके कार्यक्रम संयोजक राजिव अवस्थी यी पालिका सक्कु वडामे संचालन हुइना जनैलै । चालु आर्थिक बर्षमे वडा नम्बर १ मे सबसे ढेर ओरसे यहाँसे सुरुवाट करल बटैलै । लौवा विमारी वडा नम्बर ६ जाने, वडा नम्बर ५ ओ ६ मे एक÷एक जाने डेखल बटै । नेदरल्याण्ड लेप्रोसी रिलिफ नेपाल धनगढीके इन्चार्ज विमल चलाउने कैलारीमे अभिन १२ जाने कुष्ठरोगी उपचार करैटी रहल बटैलै ।

वडा नम्बर १ वडा अध्यक्ष धोजहरिपाल बोहराके अध्यक्षतामे हुइल कार्यक्रममे कैलारी गाउँपालिका स्वास्थ्य शाखा प्रमुख नरेशकुमार चौधरी निवारण हुइल रोग फेरसे डेखा पर्ना ओरसे एक फेरा सक्कु जाने औषधी खाई पर्ना सुझाव डेलै । कुष्ठरोग विरुद्धके औषधी खवैना अभियानके उदघाटन गाउँपालिका अध्यक्ष राजसमझ चौधरी, उपाध्यक्ष भगवतीकुमारी चौधरीलगायत भल्मन्सा अपनही औषधी खाके औरे जनहनफे खवाके करल रहिट ।