कैलारीमे २०औं राष्ट्रिय धान दिवस मनागिल

पहुरा समाचारदाता
हसुलिया, १५ असार । कैलाली जिल्लाके कैलारी गाउँपालिका वडा नम्बर १ विसनपुरमे आज २०औं राष्ट्रिय धान दिवस मनागिल बा ।

कैलारी गाउँपालिकाके प्रवद्र्धनमे हिमशिखर बहुउद्देश्यीय सहकारी लिमिटेडके आयोजनामे राष्ट्रिय धान दिवस मनागिल हो । धान तथा विविध सांस्कृतिक कार्यक्रमके वडका पहुना गाउँपालिका अध्यक्ष राजसमझ चौधरी चौधरी रहल रहिट । कलेसे विशिष्ट पहुना गाउँपालिका उपाध्यक्ष भगवतीकुमारी चौधरी रहल रहिट । कार्यक्रममे सम्बोधान करटी गाउँपालिका अध्यक्ष यहाँके किसानहुकनके सुविधा लाग कृषि प्याकेजके व्यवस्था करल बटैलै । कृषि विकासके लाग दिर्घकालिन, मध्यकालिन, अल्पकालिन तथा क्षेत्रगत योजनाके निर्माण, कृषिमे यान्त्रीकिरण, सौर्य सिचाई तथा कृषि मिटरके व्यवस्थाहे निरन्तरता डेना अध्यक्ष बटैलै ।

गुर्गी बाँधके निर्माणके लाग विशेष पहल कैनाके साथे सिचाई सुविधाके विस्तारके लाग डिप बोरिङ्ख जडान कैना योजना रहल बटैलै । कृषि उपजके बजारीकरणके लाग कृषिउपज सँकलन केन्द्र तथा हाटबजार सँचालनक समन्वय कैना, बाली विमा कार्यक्रम सँचालनके लाग आवश्यक समन्वय तथा सहकार्य करके प्रभावकारीताके साथ लागु कैना उहाँ बटैलै ।

गाउँपालिका उपाध्यक्ष भगवतीकुमारी चौधरी कृषि प्राबिधिक तथा कृषकहुकनके क्षमता विकासके कार्यक्रम संचालन कैना बटैली । उहाँ कहली, कृषि विकास तथा पशु सेवा विकासके अनुदान कार्यक्रम संचालन करेक लाग कृषि विकास कोषके स्थापना कैना । कृषि विकासके कार्यक्रम संचालनके लाग टमान विकास साझेदारसंग समन्वय करजाई ।
उहाँ कृषि उत्पादनमे अभिबृद्धि कैना एक वडा एक उत्पादन पकेट क्षेत्र कार्यक्रमहे निरन्तरता डेनाफे बटैली ।

नेपाली काँग्रेस कैलारी सभापति कृष्णप्रसाद चौधरी अब्बे धान दिवस मनैटी रहल बेला किसानहुक्रे मल खाद नइपाके अप्ध्यारोमे परल बटैलै । उहाँ कहलै, आबसे किसानहुकनहे सहजे मल के व्यवस्था करलेक लाग सहकारीसे सहकार्य कैना जरुरी रहल बटैलै ।

हिमशिखर बहुउद्देश्यीय सहकारी लिमिटेडके अध्यक्ष दुर्गाप्रसाद भण्डारीके अध्यक्षतामे हुइल कार्यक्रममे वडा नं १ के वडाध्यक्ष धोज बहादुर बोहरा, कार्यपालिका सुन्दरी चौधरी, कृषि शाखा प्रमुख मैया चौधरी, बसन्ती चौधरी, सहकारी कार्यालय प्रमुख महेन्द्र शाही, स्थानीयहुकनके सहभागिता रहे ।

दिवसके अवसरमे कार्यक्रमके वडका पहुना, विशिष्ट पहुना लगायत सहभागिहुक्रे सामुहिक धान रोपाई करल रहिट । कार्यक्रमके सञ्चालन सहकारीके सचिव विमल जोशी करले रहिट ।