सरकारी कार्यालयमे व्हीलचियेर जैना मापदण्ड अनुसार नइबनल र्याम्प भत्कागिल

पहुरा समाचारदाता
धनगढी, १५ असार । अपाङता अधिकार प्रवद्र्धन संघर्ष समितिसे एक मन्त्रालयसहित दुई सरकारी कार्यालयके व्हीलचियेर जैना अप्ध्यारा र्याम्प (खोडढु) भत्कागिल बा ।

प्रदेश सरकारसे अपाङता समावेशी बजेट विनियोजन नइकरल विरोधके यिहे असार १२ गतेसे रिले अनसन सुरु करल अपाङता अधिकार प्रवद्र्धन संघर्ष समितिसे शुकके रोज जिल्ला प्रशासन कार्यालय कैलाली, सुदूरपश्चिम प्रदेश सामाजिक विकास मन्त्रालय ओ सहरी विकास तथा भवन कार्यालयके व्हीलचियेर जैना अप्ध्यारा र्याम्प (खोडढु) भत्कागिल हो ।

लक्ष्मण विकके नेतृत्वमे गैल अपांगता रहल व्यक्तिहुक्रे मापदण्ड अनुसार नइबनल कहटी जिल्ला प्रशासन कार्यालय कैलाली, सुदूरपश्चिम प्रदेश सामाजिक विकास मन्त्रालय ओ सहरी विकास तथा भवन कार्यालयके खोडढु भत्काइल उहाँ बटैलै । उहाँ कहलै, हमार आन्दोलन जारी बा । रिले अनसनसे माग पुरा नइहुइलेसे काल्ह शनिच्चरसे अमरण अनसन बैठना कार्यक्रम रहल उहाँ बटैलै ।

राष्टिय अपांगता महासंघ सुदूरपश्चिम प्रदेश अध्यक्ष मानबहादुर साउद प्रदेश सरकारसे अपाङता समावेशी बजेट विनियोजन नइकरल विरोधके यिहे असार १२ गतेसे १५ गतेसम रिले अनसनमे बैठल बटैलै ।

राष्टिय अपांगता महासंघ सुदूरपश्चिम प्रदेश महासचिव नन्दराज भटट् अभिनसम टमान चरणके आन्दोलन कैसेकल मने सुनुवाई नइकरल बटैलै । उहाँ कहलै, यिहीसे आघे मुख्यमन्त्री, प्रदेश प्रमुख, प्रमुख जिल्ला अधिकारीलगायतहे ज्ञापनपत्र बुझाइल मने माग सुनुवाई नइहुइल बटैलै ।

रिले अनसनमे ऐक्यवद्धता जनैटी इन्सेक सुदूरपश्चिम प्रदेश संयोजक खडकराज जोशी सरकार नीति तथा कार्यक्रममे, संविधानमे अपांगता रहल व्यक्तिके अधिकार सुनिश्चित करल मने कार्यान्वयन नइकरल बटैलै । अपांगता रहल व्यक्ति राज्यसे पाई पर्ना सेवा सुविधा पाई परल कना आन्दोलनमे व्यक्तिगत ओ संस्थागत रुपमे ऐक्यवद्धता बा उहाँ कहलै । राष्टिय मानव अधिकार आयोगसे मिल्के दवाव डेनाफे संयोजक बटैलै ।