कैलारीके बर्षे÷बजेट अधिवेशन निम्जल

पहुरा समाचारदाता
धनगढी, १७ असार । कैलारी गाउँपालिका आ.व. २०७९÷०८० सालके गाउँसभा (बर्षे÷बजेट) अधिवेशन आगामी बरसके लाग प्रस्तुत कैगिल नीति तथा कार्यक्रम ओ बजेट तथा कार्यक्रम अनुमोदनसभासे पारित करटी निम्जल बा ।

गाउँसभा अधिवेशनकके टिसरा बैठक गाउँपालिका अध्यक्ष राजसमझ चौधरीके अध्यक्षतामे हुइल रहे । बैठकमे विषयगत समितिसे बार्षिक प्रगति प्रतिवेदन तयार करके सभाके अध्यक्षहे बुझाइल रहिट ।

बैठकमे गाउँपालिका उपाध्यक्ष भगवतीकुुमारी सम्बोधन करटी प्रदेश ओ संघ अइना बजेट समयमे नइआइल कारण योजनाके काममे ढिलाई हुइल बटैली । यी बरस हुइल मजा कामहे निन्तरण डेटी बजेटके सीमाभिटर रहिट आवश्यकताके आधारमे आघे बह्रना उहाँ बटैली । पालिकाभिटर रहल शाखाके काम अनुसार बजेट विनियोजन हुई पर्नामे बटैटी मेडपा ओ प्रधानमन्त्री रोजगार कार्यक्रममे निरन्तरता डेना आवश्यक रहलफे उहाँ बटैली ।

कैलारी गाउँपालिका आ.व. २०७९÷०८० सालके गाउँसभा (बर्षे÷बजेट) अधिवेशनके दुसरा बैठकमे १५ जाने गाउँसभा सदस्यहुकनसे उठाइल बाटहे सम्बोधन करटी गाउँपालिका अध्यक्ष राजसमझ चौधरी आइल मागहे विषयगत समितिसे छलफल करटी बजेटसे धानटसम सम्बोधन कैना बटैलै ।

सभासे टमान नीतिगत निर्णय अनुमोदन करले बा । चालु आर्थिक बर्षके जेष्ठ मसान्तसमके आयव्यय, कार्यपालिकासे हुइल करल निर्णय अनुमोदन करले बा । ऐन, नियम, निर्देशिका, कार्यविधि निर्माणके अधिकार कार्यपालिका प्रत्यायोजन, स्वीकृत बजेट तथा कार्यक्रममे संसोधन कैना अधिकार कार्यपालिकामे प्रत्यायोजन, राजश्व परामर्श समितिसे निर्धारण करल करके दर तथा दायरा लागु कैना निर्णय अनुमोदन करले बा ।

निर्माण सम्पन्न योजनाके जाँचपास तथा फरफारक सम्बन्धमे, संघीय तथा प्रदेश सरकारमे योजना माग, संघीय तथा प्रदेश सरकार ओ विकास साझेदारसंग समन्वय कैना निर्णय अनुमोदन करले बा । कर्मचारीके तलबी प्रतिवेदन, सेवा करारके कर्मचारीहुकनके सेवा करार (म्याद) सेवा सुविधा सम्बन्धी अधिकार कार्यपालिकाहे प्रत्योजन, लेखा परिक्षण प्रतिवेदन ओ सडक नामाकरण सम्बन्धमे (भितरीय चोकसे न्यू यूवा सुुन्दर शक्ति क्लवके मैदानसम रामसमझ मार्ग) अनुमोदन हुइल बा । ओस्टेक करके यिहीसे आघेफे राजनितिक आन्दोलनके धरोहरहुकनके नाउँसे कैलारीमे सडक नामाकरण कैगिल बा । जेम्ने जोखन रत्गैया मार्ग, छिमानन्द मार्ग ओ चक्र डगौरा मार्ग नामाकरण हुइल बा ।

५० प्रतिशत बजेट कैलारीके विकासके लाग छुटयाइले बटुः सांसद गंगाराम

कैलाली निर्वाचन क्षेत्र नम्बर ३ के प्रतिनिधिसभा सदस्य गंगाराम चौधरी अपने पैनाके कुल बजेटके ५० प्रतिशत बजेट कैलारी गाउँपालिकामे छुत्याइल बटैले बटै ।

कैलारी गाउँपालिकाके आर्थिक २०७९।०८० गाउँसभा (बर्षे। बजेट) अधिवेशनके टिसरा बैठकमे विशेष सम्बोधन करटी अपने पाइल कुल बजेटके आधा बजेट कैलारी गाउँपालिकाके विकासके लाग विनियोजन करल बटैलै । उहाँ कहलै, संघीय बजेटके ५० प्रतिशत यी पालिकामे परले बटु । सांसद पदमे आसेकल पाछे मै यी पार्टी उ पार्टी कहिके हेरले नइहु । मही विकास कैना बा । सक्कुहुनहे हाते मालो सहकार्य कैके जैना बा ।

मै सदा सहयोग कैना व्यक्तिफे हो । टबमारे यहाँ शिक्षा, कृषि, सहरी विकास, खेलकुद ओ स्वास्थ्यके हकमे होए कौनो भेदभाव नइकरके बजेट विनियोजन करलm प्रतिनिधिसभा सदस्य डगौंरा बटैलै । थारु समुदायमे जनस्वास्थ्य समस्याके रुपमे रहल सिकलसेल एनिमियाके लागफे बजेट विनियोजन करल बटैलै ।

प्रतिनितिसभा सदस्य कहलै, कैलारी गाउँपालिका प्रगतिके डगरमे आघे बह्रल बा । पालिकाके विकासहे सहयोग करेक लाग संघीय बजेट ओ व्यक्तिगतओर सेक्ना सहयोग कैना प्रतिवद्धता जाहेर करटु ।