मुद्दा विशेष रिपोटिङमे कलम चलैना आग्रह
लक्ष्मी चौधरी
धनगढी, १७ असार । संचारकर्मीहुकनहे औपचारिक ओ घटनासेफे आब मुद्दा विशेष रिपोटिङ कैना आग्रह कैगिल बा ।
सामाजिक विकास मन्त्रालयके सहयोगमे नेपाल पत्रकार महासंघ कैलालीके आयोजनामे अँटवारके रोज धनगढीमे हुइल स्वास्थ्य क्षेत्रके समस्या समाधानके लाग पत्रकार महिलाके भूमिका विषयक कार्यक्रममे ओसिन आग्रह कैगिल रहे ।
कार्यक्रममे सहजीकरण करटी अग्रज पत्रकार मनमोहन स्वाँर औपचरिक कार्यक्रम ओ मञ्च भाषण ढेर प्राथमिकता पाइल कहटी ग्रामीण क्षेत्रमे भोग जैटी रहल बास्तविक पिडा, ओ सामाजिक मुद्दामे कलम चलैना जरुरी रहल बटैलै । उहाँ कहलै, कौनो विपति अइलेसे महिला, बालबालिका, बुढापाका, ओ असक्ता व्यक्ति सबसे पीडा भोग परठ । गाउँघरमेफे जवान मनै ढेर महिला बालबालिका पीडा भोगे परल बा । महिलाहुक्रे टमान जनस्वास्थ्य समस्या भोगे परल बा । उ समस्या बाहेर आइनइसेकल हो । आब ओकरबारे कलम कलम चलैना आवश्यकता बा । ओस्टेक करके उहाँ स्वास्थ्य क्षेत्रके समस्या समाधानके लाग पत्रकार महिलाके भूमिका विषयक कार्यपत्र प्रस्तुत करटी अन्तरक्रिया करल रहिट ।
नेपाल पत्रकार महासंघ कैलालीके अध्यक्ष हिमालय जोशी पत्रकार महिलाहुकनके स्वास्थ्यके रिपोटिंगमे सहजुल होए कहटी एक दिने अन्तरक्रिया कार्यक्रमके आयोजना करल बटैैलै । उहाँ कहलै, पत्रकार महिलाहुक्रे महिलनसे भोग्टी स्वास्थ्य समस्यबारे रिपोटिंग कैना आग्रह करलै । कार्यक्रमके संचालन नेपाल पत्रकार महासंघ कैलालीके सचिव प्रेम चौधरी करल रहिट ।
