भूमिहीनहे जग्गाधनी बनैटी
पहुरा समाचारदाता
सुखड, १९ असार । कैलालीके स्थानीय तहमे भूमिहीन दलित, सुकुमवासी ओ अव्यवस्थित बसोवासीहे जग्गाधनी बनाइक लाग जग्गा नाप नक्साके काम धमाधम सुरु हुइल बा । घोडाघोडी नगरपालिकासे वडा नम्बर १२ से जग्गा नाप नक्साके काम सुरु करल हो ।
छोट समयमे पालिकाके वडा नम्बर ११ ओ १२ के काम पूरा कैकै इहे अँट्वारसे वडा नम्बर ४ मे जग्गा नाप नक्साके काम सुरु हुइल बा । नगरपालिकाके प्रमुख खड्कबहादुर रावत वडा नम्बर ४, मैतुवा गाउँके भूमिहीन दलित, भूमिहीन सुकुमवासी ओ अव्यवस्थित बसोवासीके लाग जग्गा नाप कार्य शुभारम्भ करल बटैलै ।
नगरपालिकासे पहिल चरणमे वडा नम्बर १२, ११, ४ ओ १ मे जग्गा नाप नक्साके काम ओराके लालपुर्जा वितरणके प्रक्रिया चल्ना जनैले बा । ओस्टके बर्दगोरिया गाउँपालिकासे फेन भूमिहीनहे लालपुर्जा वितरण सुरु करले बा । शनिच्चरके लालपुर्जा वितरण कार्यक्रमके शुभारम्भ कैटी पालिका अध्यक्ष कर्णबहादुर कुँवर वडा नम्बर ३ के ६ जनहनहे पुर्जा वितरण करल हुइट ।
पालिका अध्यक्ष कुँवर वडा नम्बर ३ मे पहिल चरणमे रातो फारम भरल मध्ये सरकारसे उपलब्ध करैना जग्गा नैलेके आपन उपभोग करटी रहल जग्गा किल लेना चाहुइया व्यक्तिहे जग्गाधनी पुर्जा वितरण करल बटैलै ।
अध्यक्ष कुँवर कहलै, “रातो फारम भरके सरकारी मापदण्डके आधारमे जग्गा लेहे चाहुइयाहुक्रनके व्यवस्थापन भूमि आयोगमार्फत सङ्घीय सरकारसे कैना बा, मने अपने उपभोग करल जग्गा किल लेबी कहुइयाहे आयोगमार्फत सिफारिस कैना काम हुइटी रहल बा ।”
पुर्जा पउइयामे वडा नम्बर ३ के रामबहादुर नेपाली, नन्दकला खत्री, गौरी दमाई, मिलन ओली, अम्मरबहादुर विश्वकर्मा ओ रमादेवी विश्वकर्मा रहल बाटै । उहाँहुक्रनहे नेपाल सरकार भूमि व्यवस्था, सहकारी तथा गरिबी निवारणमन्त्री रञ्जिता श्रेष्ठके बर्का पहुनाइमे पुर्जा हस्तान्तरण करल हो ।
