मानव अधिकारके अवस्थामे सुधार नैआइल
पहुरा समाचारदाता
धनगढी, १९ असार । तीन तहके सरकारसे काम करटी रलेसे फेन सुदूरपश्चिम प्रदेशमे मानव अधिकारके अवस्थामे सुधार नैआइल एक कार्यक्रमके सहभागीहुक्रे बटैले बाटै । सुदूरपश्चिम प्रदेशमे मानव अधिकारके अवस्था विषयक धनगढीमे आयोजित अन्तरक्रिया कार्यक्रममे उहाँहुक्रे ओइसीन बटाइल हुइट । ऐन, नीति, नियम पर्याप्त मात्रामे बन्लेसे फेन ओकर कार्यान्वयन फितलो होके मानव अधिकारके अवस्थामे सुधार हुइ नैसेकल उहाँहुक्रनके कहाइ रहल बा ।
कार्यक्रममे सुदूरपश्चिम प्रदेशके महान्यायाधिवक्ता कुलानन्द उपाध्याय मानव अधिकार उलङ्घन सम्बन्धी घटनाके तथ्यांकसे इ प्रदेशके जर्जर अवस्थाहे डर्सैटी रहल बटैलै । मुलुकमे तीन तहके कैके ७६१ सरकारसे काम करटी रलेसे फेन मानव अधिकारके अवस्था मजा नैरहल उहाँके कहाइ रहे ।
प्रदेश सरकारके कानुनी सल्लाहकारके हैसियतसे अपने सुधारके लाग लिखित रूपमे नै सरकारके ध्यानाकर्षण करैलेसे फेन सुनुवाइ नैहुइल उपाध्याय बटैलै । “खास कैके, शिक्षा, स्वास्थ्य जैसिन नागरिकके सरोकारसँग सम्बन्धित ऐन कानुन, आभिन बने सेकल नैहो”, उहाँ कहलै,“ओहेमारे, सुधारके लाग सक्कु जाने लागी ।”
सन २०२२ मे इ प्रदेशमे राज्य पक्षसे १५ जाने ओ गैर राज्य पक्षसे एक हजार १७७ जाने मानव अधिकार ज्यादतिके घटनामे पीडित हुइल इन्सेकके तथ्यांकमे उल्लेख रहल बा । ओस्टके, महिला अधिकार उलङ्घनके घटनामे ९५६ ओ बाल अधिकार उलङ्घनके घटनामे १०१ जाने पीडित हुइल जनाइल बा । ओस्टके, जातीय विभेदके घटनामे पाँच जाने पीडित हुइल बाटै ।
सन २०२३ के जनवरीसे जुनसम राज्यपक्षसे चार ओ अन्य पक्षसे ६०३ कैके ६०७ जाने पीडित हुइल बाटै । महिला अधिकार उलङ्घनके घटनामे पाँच सय जाने ओ बाल अधिकार उलङ्घनके घटनामे ४७ जाने पीडित हुइल जनाइल बा ।
राष्ट्रिय मानव अधिकार आयोगके प्रदेश प्रमुख हरि ज्ञवाली राज्यके निकायहे मानव अधिकारप्रति पारदर्शी बनाइक लाग ध्यानाकर्षण करैटी अइलेसे फेन सम्बोधन हुइ नैसेकल बटैलै । उहाँ आर्थिक, सामाजिक, मानव अधिकारके बात बारम्बार उठैटी अइलेसे फेन राज्यके निकायसे इहीहे गम्भीरतापूर्वक लेहे नैसेकल उल्लेख करलै ।
“हम्रे ज्या बात उठैटी रहल बाटी । उहीहे सम्बोधन कैना मेरके कार्यक्रम आइल नैडेखजाइठ्”, उहाँ कहलै,“सुनुवाइ हुइल नैहो । संयुक्त रूपमे काम करी ।”
इन्सेकके प्रदेश संयोजक खडकराज जोशी कानुन कार्यान्वयनमे कमजोरी हुइल कारणसे मानव अधिकारके अवस्था जटिल रहल बटैलै । तीन तहके सरकार रहल बेला मानव अधिकारके अवस्था विगतसे फेन निराशाजनक रहल कहटी मानव अधिकारकर्मी चित्रा पनेरु सरकारहे सक्कु जाने मिलके खबरदारी कैना आवश्यक रहल उल्लेख करली ।
कार्यक्रममे मुक्त कमैयाके क्षेत्रमे काम करुइया जगदीश राना शिक्षा निःशुल्क कलेसे फेन सामुदायिक विद्यालय टमान नाउँमे पैसा असुलल् बटैलै । इहीसे मुक्त कमैया ओ विपन्न वर्गके बालबालिकाके शिक्षार्जनमे समस्या हुइल उहाँ बटैलै ।
इन्सेकके आयोजनामे कार्यक्रम हुइल रहे । उत्कृष्ट कार्य करल बापत उहे कार्यक्रममे इन्सेकके दार्चुला प्रतिनिधि नरेन्द्र कार्कीहे पुरस्कृत फेन करल रहे ।
