धनगढीके विकासमे पत्रकारिताके भूमिकाबारे अन्तरक्रिया

पहुरा समाचारदाता
धनगढी, २० असार । धनगढी उपमहानगरपालिकाके विकासमे पत्रकारिताके भूमिकाबारे बुधके रोज संचारकर्मीहुकनसे अन्तरक्रिया कार्यक्रम कैगिल बा ।

नेपाल पत्रकार महासंघ सुदूरपश्चिम प्रदेश समितिके आयाजना ओ धनगढी उपमहानगरपालिकाके सहकार्यमे बुधके रोज धनगढीमे धनगढीके विकासके लाग पत्रकारिताके भूमिका विषयमे अन्तरक्रिया हुइल हो ।

कार्यक्रमके उद्घाटन करटि धनगढी उपमहानगरपालिकाके प्रमुख गोपाल हमाल स्थानीय तहके विकासमे सञ्चार माध्यमके अहम भूमिका रहल बटैलैं । उहाँ कलैं, “स्थानीय निकायके करल काम पारदर्शी हुइल वा नैहुइल कना सञ्चार माध्यम हेरटि रहठ ओ पारदर्शिता नैहुइटि किल स्थानीय सरकारहे सचेत करैना करठ ।”

उ अवसरमे उहाँ धनगढीमे ठाउँके अभावमे आवश्यकता अनुसार शौचालय, गाडी पार्किङ बनाइ नैसेकल बटैलैं । “पार्किङ, शौचालयके लाग पालिकामे बजेट बा, मने कहाँ बनैना हो ठाउँ नैहो,” उहाँ कलैं, “यकर व्यवस्थापनके लाग नगरपालिका मुख्य सडकमे रहल सक्कु सरकारी कार्यालयहे कुछ ढेर ठाउँ डेना आग्रह करले बटि ।”

कार्यक्रममे महानगरपालिकाके उपप्रमुख कन्दकला राना सरकार पुगे नैसेक्ना ठाउँमे मिडिया पुग्ना हुइल ओरसे विकासके लाग सञ्चार माध्यमके महत्वपूर्ण योगदान रहल बटैलैं । “टमान ठाउँमे विकासमे काम हुइल कि नैहुइल कना सरकारहे पटा नैरहे सेकठ,” उहाँ कलैं, “विकास नैहुइल क्षेत्रमे मिडिया डेखा डेलेसे सरकार वहाँ विकासके कार्यक्रम बनाइ सेकजाइठ ।” उहाँ कामके आधारमे फेन पालिकासे बजेट छुट्याइल फेन जानकारी करैलैं ।

ओस्टेके, कार्यक्रममे नेपाल पत्रकार महासंघ सुदूरपश्चिम प्रदेश समितिके पूर्व अध्यक्ष अर्जुन शाह स्थानीय तहमे विकासके लाग सञ्चार माध्यम सरकारहे नीतिगत, सैद्धान्तिक तथा व्यवहारिक रुपमे सहयोग करे सेक्ना बटैलैं । उहाँ सरकारहे सुशासनयुक्त ओ पारदर्शिता कायम कराइक लाग स्थानीय तहसे सञ्चारमैत्री नीति बनाके सञ्चार माध्यमके सम्वद्र्धन करेपरना फेन बटैलैं । उहाँ धनगढी उपमहानगरपालिका कार्यपालिकाके बैठक प्रत्यक्ष प्रशारण, नियमित सूचना प्रशारण, सूचनाके हकमे पर्यात्न करटिरहल जानकारी करैले रहैं ।

कार्यक्रममे प्रेस चौतारीके सुदूरपश्चिम प्रदेश महासचिव शिवराज भट्ट, नेपाल प्रेस युनियनके प्रदेश महासचिव टेकेन्द्र देउवा, नेपाल पत्रकार महासंघके पूर्व केन्द्रीय सदस्य मीन बम, प्रेस चौतारीके जिल्ला अध्यक्ष भानुभक्त आचार्य, सविन भट्ट, शेरबहादुर ऐर लगायत मन्तव्य व्यक्त करले रहैं ।

नेपाल पत्रकार महासंघ सुदूरपश्चिम प्रदेश समितिके अध्यक्ष योगेश रावलके अध्यक्षमे हुइल कार्यक्रमके सञ्चालन सचिव हरि जोशी करले रहैं ।