पालिकामे संचालित योजनाके अनुगमन

पहुरा समाचारदाता
हसुलिया, २१ असार । कैलाली जिल्ला कैलारी गाउँपालिकाके टमान वडामे संचालित योजनाके अनुगमन कैगिल बा ।
पालिका स्तरीय अनुगमन समितिके संयोजक भगवतीकुमारी चौधरीके नेतृृत्वमे बुधके रोज टमान वडामे संचालन रहल योजनाके स्थलगत अनुगमन कैगिल हो ।

समितिसे वडा नम्बर ७ फुइयाँफाटामे रहल राष्टिय माविके भवन निर्माणके अनुगमन कैगिल बा । २० लाख बजेटमे निर्माण हुइल यकर काम सम्पन्न हुइल बा ।

वडा नम्बर ५ सुनहरा ताल आधारभूत विद्यालयके भवन निर्माणके अनुगमन कैगिल बा । साढे २७ लाख बजेटमे निर्माण हुइल यी भवनके झयाल ढोकामे पल्ल लगैना बाहेक सक्कु काम सम्पन्न हुइल बा । कलेसे समितिसे एक दुई दिन भिटर काम सेक्ना विद्यालय व्यवस्थापन समितिहे सुझाव डेहल बा ।

कैलारी गाउँपालिका वडा नम्बर ९ मे रहल रौरा बाबा विद्युत सहकारी संस्था लिमिटेडके भवन निर्माण हुइटी रहल ओरसे एक दुई दिनभिटर काम सेक्ना सुझाव डेहल बा । यकर लाग २४ लाख बजेट विनियोजन करल बा ।

तराई मधेश समृद्ध कार्यक्रम अन्र्तगत पवेरा जवदहुवाके सिमानासे रतनपुर हुइटी भुइयाफाँटासम सडक ढलान कालोपात्रेके काम हुइटी रहल मने तत्काल काम सेक्ना अवस्था नइरहल अनुगमन समिति जनैले बा । यकर लाख ५० लाख मे सदर हुइल रहे ।

गोबरैलासे विसनपुर, छोटिपलिया हुइटी भुइयाँफाँटासम काम सम्पन्न हुइल बा । मने जौन मेरिक गुणस्तरीय काम हुई पर्ना रहे ओसिन नइहुइल हो । सडक स्तरोेन्नतीके लाग हुइल काममे डेनसिटी अनुसार काम नइहुइल ओरसे ठेकेदारहे सुधार कैना निर्देशन डेहल बा ।

कैलारी गाउँपालिकाके योजना शाखा प्रमुख सन्तोष कुमार चौधरी पालिकामे संचालित चार पाँच ठो योजना यी आर्थिक बर्षमे सम्पन्न करे नइसेक्ना बाहेक करिब सक्कु योजना सम्पन्न हुइल बटैलै ।