एसईईके नतिजा सार्वजनिक, गैल वर्षसे सुधार
काठमाडौं, २१ असार । माध्यमिक शिक्षा परीक्षा (एसईई) के नतिजामे गैल वर्षसे सुधार हुइल बा । राष्ट्रिय परीक्षा बोर्डसे बिफेक रोज सार्वजनिक करल नतिजामे उप्पर जीपीए ननुइयाके संख्या बह्रल विल्गाइल बा ।
बोर्डके अध्यक्ष महाश्रम शर्मासे एसईईके नतिजा गैल वर्षसे सुधार हुइल बटैलै ।
उहाँके अनुसार ३.६ से ४ जीपीए ननुइयाके संख्या गैल वर्ष ९ हजार ६३३ जाने रहलमे यी वर्ष २२ हजार ४७५ जाने रहल बटै । गैल वर्ष यी संख्या कुल परीक्षार्थीके १.९४ प्रतिशत रहलमे यी वर्ष बह्रके ४.६३ प्रतिशत पुगल शर्मा बटैलै ।
ओस्टेक ३.२ से ३.६० जीपीए ननुइया परीक्षार्थीके संख्या गैल वर्ष कुल परीक्षार्थीके ८.४ प्रतिशत रहलमे यी वर्ष बह्रके ११.३६ प्रतिशत पुगल बा । ‘यी वर्ष उप्पर रेन्जके जीपीए ननुइयाके संख्या गैल वर्षसे ढेर बा’ उहाँ कहलै ।
अध्यक्ष शर्मा कोभिड–१९ के महामारी सेकलपाछे विद्यार्थी पह्रना समय पर्याप्त पाइल ओरसे नतिजामे सुधार हुइल बटैलै ।
विगतके वर्षमे विद्यार्थीसे कक्षाकोठामे नियमित उपस्थित हुई नइपाइल ओ शिक्षक शिक्षिकासंग भौतिक रुपमे परामर्श करे नइपाइल नतिजा कमजोर डेखल उहाँक कहाई बा ।
ओस्टेक करके विद्यालय ओ कक्षा कोठाके अवस्था सुधार ओ परीक्षा प्रणालीमे आइल सुधारके कारणफे नतिजा मजा आइल उहाँक दाबी बा । ‘कोभिड महामारी सेक्नाके अलावा यी नतिजासे डेखाइल की विद्यालय ओ कक्षाकोठाके वातावरणमे सुधार अइटी बा । ओकरपाछे परीक्षा प्रणालीमे हुइल सुधार, तथा उत्तर पुस्तिका परीक्षणमे भेरिएसन कम हुइना करके करल सुधारसे रिजल्ट मजा डेखल’ शर्मा कहलै ।
बोर्डसे यी वर्षसे अंग्रेजी, गणित ओ विज्ञान विषयमे स्तरीकृत परीक्षा प्रणाली लागू करल कारणसे नतिजा सुधार आइल उहाँक कहाई बा ।
रिजल्टके लागः www.see.gov.np
www.results.matraeducation.com
