गेटा विश्वविद्यालयमे दवाव डेना वैद्धिक मन्त्रसहित होम
पहुरा समाचारदाता
धनगढी, २२ असार । सहिद दशरथचन्द राष्ट्रिय स्वास्थ्य विज्ञान विश्वविद्यालयके आघे विफेक सकारे बैद्दिक मन्त्रसहित होम कैगिल बा । सहिद दशरथचन्द राष्ट्रिय स्वास्थ्य विज्ञान विश्वविद्याल स्थापनार्थ संघर्ष समितिसे दबाबमुलक कार्यक्रम कैगिलक हो ।
संघर्ष समितिके संयोजक लोकराज पाण्डे मेडिकल विश्वविद्यालयके विधेयक पास कैख हाली छ सय शैय्याके अस्पताल संचालनके लाग दबाब डेना बैद्दिक मन्त्रसहित होम करल बटैलै । पाण्डे विश्वविद्यालयके मुल गेट आघे ब्राह्मण मन्त्रसहितके होम कैगिल बटैलै ।
सरकारसे माघ २९ गते मन्त्रिपरषदके बैठकसे गेटामे सहिद दशरथचन्द राष्ट्रिय स्वास्थ्य विज्ञान विश्वविद्यालय स्थापना घोषणा करके जेठ ५ के नीति कार्यक्रममेफे समेटल हुइलेसेफे जेठ १५ के बजेट भाषणमे गेटामा प्रतिष्ठान बनाके एक सय शैय्याके अस्पताल चलैना बटाइलपाछे सुदूरपश्चिममे आन्दोलन सुरु हुइल हो ।
