विपद प्रतिकार्यके लाग तयार रना निर्देशन

पहुरा समाचारदाता
हसुलिया, २२ असार । कैलारी गाउँपालिकाके अध्यक्ष राजसमझ चौधरी विपद प्रतिकार्यके लाग तयार रना निर्देशन डेले बटै ।

कैलारी गाउँपालिका विपद व्यवस्थापन समितिके आयोजना तथा नेपाल रेडक्रस सोसाइटी जिल्ला शाखा कैलालीके प्राविधिक सहयोगमे हसुलिया हुइल दुई दिने विपद प्रतिकार्यके लाग खोज तथा उद्धार तालिम समापन कार्यक्रममे बोल्टी उहाँ बर्खा बुंदीके समय सुरु हुइल ओ विपद जौनफे बेला आइसेक्ना कहटी तयारी अवस्थामे बैठना निर्देशक डेहल हुइट ।

उहाँ कहलै, कैलारी गाउँपालिका विपदके दृष्टिकोणमे उच्च जोखिममे परठ । गैल बरस बैशाख ११ गते वडा नम्बर ७ विपतपुर मुक्तकमैया बस्तीमे भीषण आगलागी हुके बस्ती शखाप हुइल । चटयांग (बाज) लागके एक जानेक मृत्यु हुइल । वडा नम्बर ३ शिवरत्नपुरमे बाढ कटानसे १६ घर विस्थापित हुइल बा ।

गैल बरस प्राकृतिक प्रकोपसे यी पालिकामे धानजनके हुइल बा, गाउँपालिका अध्यक्ष कहलै, बाढ जौनफे बेला आइसेक्ना ओरसे विपद प्रतिकार्य दलके सदस्य तयारी अवस्थाममे रहे । कैलारी गाउँपालिकमे पर्ना मोहना, घुराह, कटैनी लडिया क्षेत्रके स्थानीय जोखिममे रहल बटै ।

गाउँपालिका अध्यक्ष कहलैै, गैल बरस विपद प्रतिकार्यके लाग तालिमके साथे कृतिम अभ्यास कैगिल रहे । यी बरसफे विपद व्यवस्थापनके लाग टमान समिति बनाके छलफल हुइल बा । कृतिम अभ्यासफे कैगिल बा ।

तालिम समापन कार्यक्रममे वडा नम्बर ४ के वडा अध्यक्ष तथा विपद व्यवस्थापन समितिके संयोजक ठागुराम चौधरी तालिममे बाढ ओ आगलागी लगायत टमान विपदके जोखिमसे बाँचेक लाग कृतिम अभ्यास कैगिल बटैलै । उहाँ कहलै, विपद आगिलेसे प्रतिकार्य कैना सहजुल होए कहटी टमान क्रियाकलाप कैगिल बा । विपद आपरलेसे सीपहे व्यवहारिक रुपमे लागु कैना उहाँ आग्रह करलै । तालिममे नेपाल रेडक्रस सोसाइटी कैलाली शाखाके मन्त्री लोकराज जोशी, मार्कण्डेय उपाध्याय लगायतसे प्रशिक्षण तथा सहजीकरण करल रहिट । कार्यक्रममे कैलारी गाउँपालिकाके विपद व्यवस्थापन शाखाके फोकल पर्सन भुवन बखरिया, कार्यपालिका सदस्य, वडा सदस्यहुकनके सहभागिता रहे । तालिम समापन कार्यक्रमके संचालन नेपाल रेडक्रस सोसाइटी कैलालीके तारणीदत्त पाण्डेय करल रहिट ।

कैलारी गाउँपालिकामे विपद जोखिम न्यूनिकरणके लाग रबर बोट, साइरन, लाइफ ज्याकेट डेहल बा । मोहनपुरमे समुदायमे स्थापना हुइल समुदाय स्तरीय आपतकालिन खोज तथा उद्धार सामाग्री भण्डारणमे हाते माइक ओ व्यट्री १, टर्च ४, लाइफ ज्याकेट ६, सिट्टी १०, रबरबुट जोडी ६, हेड टर्च ६, रेनकोट ६, स्ट्रेचर २, त्रिकोणपट्टी २०, त्रिपाल, प्राथमिक उपचार सामाग्री ओ बक्स एक ठो, थ्रो व्याग ओ २० मिटर डोरी २, लाइफव्वाय टयुव २ लगायत टमान सामाग्री, गैल बरस हस्तारन्तरण कैगिल रहे ।
विपदके उच्च जोखिममे रहल मोहनपुरमे सामुदायिक सिकाई केन्द्रके अलगे भवन बा । विपदसे बाँचेक लाग मोहनपुरमे गठन हुइल विपद व्यवस्थापन समितिके सदस्य तथा स्थानीयहुकनके तालिमफे डेहल बा । वडा नम्बर ३ शिवरत्नपुरमे सुरक्षित भवनके निर्माण हुइटी रहल बा ।