सहकारीके पदाधिकारीहुुकन सहकारी व्यवस्थापन तालिम

पहुरा समाचारदाता
हसुलिया, २३ असार । कैलारी गाउँपालिका महिला तथा बालबालिका शाखाके आयोजनामे महिला विकास बहुउद्देश्यीय कृषि सहकारी संस्थाके पदाधिकारीहुकनके सहकारी व्यवस्थापन सम्बन्धी तालिम डेगिल बा ।

गैल असार १९ से सुरु हुइल तालिम शनिच्चरके रोज समापन हुइल बा । तालिम समापन कार्यक्रमके वडका पहुना कैलारी गाउँपालिकाके उपाध्यक्ष भगवतीकुमारी चौधरी रहल रहिट । कार्यक्रममे बोल्टी उहाँ पालिकासेफे सहकारी क्षेत्रमे लगानी करल बटैली । महिलाहुकनहे आर्थिक तथा सामाजिक रुपमे सशक्त बनैना महिला सहकारी अति उपयुक्त माध्यमके रुपमे रहल ओरसे गाउँपालिकासे एक सहकारी एक उद्योगके नीति लेके सहकारीहे सशक्त बनैना प्रयास करटी रहल बटैली ।

पालिकाभिटर महिलाहुकन संचालन करल महिला विकास बहुउद्देश्यीय, महिला विकास कृषि ओ महिला बचत तथा ऋण सहकारी सस्थाके संचालक समिति, लेखा समिति, शिक्षा समितिके पदाधिकारी ओ व्यवस्थापकहुकनहे सहकारी व्यस्थापन सम्बन्धी पाँच दिने तालिम डेहल कैलारी गाउँपालिका महिला तथा बालबालिका शाखाके प्र्रमुख बालकुमारी चौधरी बटैली ।

तालिममे भुमि व्ववस्था कृषि तथा सहकारी मन्त्रालयके मोहनदेव अवस्थी, उदयदेव बहुउद्देश्यीय सहकारी सस्थाके कार्यकारी अधिकृत गणेश बहादुर चन्द, आदर्श बहुउद्देश्यीय सहकारी सस्था फुलवारीके रुद्र प्रसाद खनाल, नवजीवन सहकारी सस्थाके अध्यक्ष देबबहादुर वम ओ ओरेक नेपालके वरिष्ठ कार्यक्रम अधिकृत गिता चौधरीलगायत सहजीकरण करल रहिट ।

कार्यक्रममे पारदर्शी महिला विकास बहुउद्देश्यीय सहकारी, चेतनशिल महिला विकास बहुउद्देश्यीय सहकारी संस्था लिमिटेड, समीक्षा, जनचेतना कृषि सहकारी, मुक्त कमलहरी कृषि सहकारी, शरण र श्रमशिल कृषि सहकारि सस्था करके ६ ठो महिला सहकारीके सक्रिय सहभागिता रहे । तालिममे सहकारी ऋण, बचत, सामाजिक क्षेत्रमे सहकारीके योगदान, लेखा व्यवस्थापन ओ उद्योग संचालन सहकारी संगठन, महिला सहकारीके सञ्जालीकरणबारे छलफल करल रहे ।