कैलारीके आ.व २०७९÷०८० के सार्वजनिक सुनुवाई

पहुरा समाचारदाता
हसुलिया, २८ असार । कैलाली जिल्ला कैलारी गाउँपालिकाके आर्थिक बर्ष २०७९÷०८० सालके सार्वजनिक सुनुवाई कार्यक्रम निम्जल बा ।

आर्थिक बर्ष आ.व २०७९÷०८० मे करल काम, सेवा प्रवाह, आयोजना ओ कार्यक्रममे बारेमे जानकारी देहक लाग सार्वजनिक सुनुवाई कार्यक्रम करल हो । कार्यक्रमके अध्यक्ष तथा गाउँपालिका अध्यक्ष राजसमझ चौधरी पालिकामे हुइल कैगिल कार्यक्रमके बारेमे जानकारी डेना पारदर्शिता ओ सुशासनके लाग पालिका सदैव तत्पर रहल बटैलै ।

जनप्रतिनिधिप्रति आम नागरिकसे ढेर आपेक्ष रख्ना स्वाभाविक हो,’ गाउँपालिका अध्यक्ष कहलै, ‘पालिका अपनथेन रहल बजेटके सीमाभिटर रहिके काम कैना हो । कोई काममे गुणस्तर बा की नइहो कना पालिकासे अनुगमन कैजाइठ । नागरिकफे अपन गाउँठाउके विकासप्रति चासो रख्ना चाही । नागरिकसे आइल गुनासो सल्लाह पालिकाके लाग मार्ग निर्देशक हुई ।’

उहाँ कहलै, ‘पालिकाभिटर कौनो योजना संचालन हुइल कलेसे आम नागरिक जाने पैना अधिकार हो । कुहीहे चासो रहलेसे सूचना लेहे सेक्जाइठ । सार्वजनिक सुनुवाई कार्यक्रममे आइल प्रश्नके जवाफ डेटी उहाँ अपनेहुक्रे निर्वाचित हुके आइलपाछे मल खादके लाग व्यवस्था करुवाइल बटैैलै । कैलारी गाउँपालिकाके सुर्मिनाला बढैपुर सडकखण्र्डमे संघके बजेट हुइल कालोपत्रे गुणस्तरहिन हुइल कना बाट आइबेर ठेकेदारहे गुणस्तरीय बनैना दबाव डेहल प्रदेश ओ संघीय सरकारके ध्यानाकर्षण कराइल बटैलै ।

घुरहा पुलके समस्या स्थानीय सरकारके बजेटसे भ्याई नइसेक्ना ओरसे प्रदेश ओ संघसे पहल करल, डगर संचालनके लाग स्थानीय सरकारसे बजेट विनियोजन करटी आइल बटैैलै । गुरगी बाँध निर्माणके लाग अलग्गे समिति गठन हुइल, ताल ठेक्कासे रकम, सटर भाडाके रकम, घाटके रकम उठे नइसेकल उहाँ बटैलै ।

खानेपानी उपभोक्ता समिति निष्कृय रहल कारण टंकी बन्केफे घर खानेपानी सुविधा पुगाई नइसेकल,झोलुङगे पुलके ठेकेदार समयमे काम नइकरल कारण मोहनपुरमे झोलुङे पुल बनाई नइसेकल, कृषि मिटरके लाग विद्युत कार्यालयमे सहजताके लाग समन्वय करल बटैैलै । मुक्तकमलरीके लाग तालिम लगायत सीप मुलक कार्यक्रमके आयोजना करल ओ मुक्तकमलरीसे संचालन करल सहकारीमे प्राथमिकता डेना बटैलै । सम्झौता हुइल योजनाके पैसाके रकम केन्द्रसे काटके पठाईबेर काम कैना कर्रा गाउँपालिका बटैलै । छिमेकी पालिकासे सहकार्य करके डमकल खरिदके लाग बजेट विनियोजन करल मने बाट कैगिल पालिकासे कमी कम्जोरी हुइल कारण खरिद करे नइसेकल ओ पैसा बचल बटैलै ।

मोहनपुर गाउँमे पाँच लाख बजेट विनियोजन करल, हौसलपुरमे बालविकास कक्ष संचालन करल मने बालबालिका हेरैना प्रवृति डेखल, कैलारी गाउँपालिका बाढ प्रभावित क्षेत्र हो, किसानहुकनहे पिरमार्क बुझके मालपोत कर आधा घटाइल अध्यक्ष बटैलै । पालिकामे जग्गाके अभाव कोचकाँच कैके बैठे परल ओ पालिकासे भवन नयाँ भवन बनाई नइसेकल बटैलै । पालिकाभिटर ताल तलैया, धार्मिक मन्दिर ढेर बा, पालिकासे पर्यटक क्षेत्रके रुपमे लगैना उहाँ बटैलै ।

ओस्टेक करके सेवा निवृत हुइल महिला स्वास्थ्य स्वयं सेविकाहे १ लाखनगद सहित सम्मान विदाई कैना, छोटी भन्सारके लाग पहल कैनाफे गाउँपालिका अध्यक्ष बटैलै ।

गाउँपालिका उपाध्यक्ष भगवतीकुमारी चौधरी चालु आर्थिक बर्षमे भारी योजनाके ठेकेदार मजासे काम नइकरलपाछे पैसा कटौटी करेबेर रोइलो करल बटैली । उहाँ कहली, ‘हरेक योजनाके अनुगमन करेबेर सुझाव डेना कैगिल रहे । कोई ठेकेदार गुणस्तर काम नइकरल कलेसे पैसा कटौटी कैगिल बा । अटेरी करुइया ठेकेदारसे अइना दिनमे कौनो सम्झौता नइकैना ओ कालोसुचीमे समेत ढारजाई ।’ पालिकामे राजश्व बह्राईक व्यापारीहुकनहे पालिकामे दर्ता हुइना निर्देशन, ताल तलैयाके पैसा असुलीके लाग पत्र पठैना कैगिल बा पैसा नइबुझुइयाके पालिकासे मिल्ल सेवा सुविधा रोक्का कैनाफे उहाँ बटैली ।

प्रमुख प्रशासकीय अधिकृत विरबहादुर ऐर पालिकासे प्रदान कैना सेवा सुविधाके कुहीहे भेदभाव नइकरल बटैलै । उहाँ कहलै, ‘कर्मचारी, जनप्रतिनिधि सक्कु जानेक साझा व्यक्ति हुइट । पालिकासे डेना सेवा सुविधामे सक्कु जनहनहे सम्मान व्यवहार कैजाईठ ।

कार्यक्रममे राष्ट्रिय प्रजतन्त्र पार्टीके नेपालु चौधरी हसुलिया बजार ऐलानी रहल, छोटी भन्सार स्थापना करे पर्ना, कृषि हाट बजारके व्यवस्था करे पर्ना आग्रह करलै । उहाँ कहलै, ‘पहिले हसुलियामे कृषि हाट बजार लागे सक्कु जाने एक ठाउँमे जानके टिना किने पाइट । उत्पादनकफे एक ठाउँमे बैठके विक्री कैना अवस्था रहे । अब्बे नइहो । यकर व्यवस्था पालिकासे कैना जरुरी बा ।’

नागरिक उन्मुक्ती पार्टीके नेता भीष्म चौधरी जनमुखी काम करे पर्ना बटैलै । उहाँ कहलै, ‘कैलाली क्षेत्र नम्बर ३ मे संघ ओ प्रदेशमे नागरिक उन्मुक्ती विजय हुइल ओरसे स्थानीय तह समन्वय कैके आघे बह्रना चाही ।’ मोहनपुर ओ भित्तरिया जोरना मोहना पुलमे पक्की पुलके लाग संघसे बजेट विनियोजन करल बटैलै ।

नागरिक उन्मुक्ती पार्टीके रमित ओली मोहनापारी सीमासे जोरल जनताके विषयमे स्थानीय सरकारके ध्यान जैना जरुरी रहल औल्याइलै । उहाँ कहलै, ‘मोहना लडियाके उप्पर मोहनपुर, शिवरत्नापुर, हौसलपुर कैके तीन गाउँ बा । उ ठाउँके जनता भारतियासे सास्ती भोगे परल बा ।’

बैजपुरके भल्मन्सा ओमप्रकाश चौधरी उपभोक्ता काम कैके पैसा नइपाइल गुनासो करलै । योजना काहे अधुरा रहठ रहठ, पालिकासे कडाईके साथ अनुगमन कैना, तालतलैया पालिकाके मतहतमे नानके आम्दानी बह्राई पर्ना बटैले ।
स्थानीय व्यापारी तथा यूवा सुनिल चौधरी हसुलिया, पालिकाभिटर सक्कु बजारहे व्यवस्थित बनैना, कैलारीमे एक ठो बहुमुखी क्याम्पस स्थापना हुई पर्नामे बाटमे जोर डेहल रहिट ।

स्थानीय जन्तीराम चौधरी हसुलियामे बहुमुखी क्याम्पसके महायज्ञ हुइल मने अभिनफे कार्यान्वयन नइहुइल बटैलै । पालिकासे हुइना गतिविधिके जानकारी जनतासम पुगैना सहजुल वातावरण बनाई पर्ना बटैलै । सुनहरा आधारभूत विद्यालयमे शिक्षक दरबन्दीके मागफे करल रहिट ।

वडा नम्बर ४ स्थानीय भीम तिरुवा विगतके स्थानीय सरकार ग्राभेल युक्त दाबी करलसे यी सरकार आघे प्रक्रियामे बह्रैना सुझाव डेलै । मुक्तकमलरी विकास मञ्चके जिल्ला सचिव रिता चौधरी मुक्त कमलरीहुकनके लाग निशुल्क शिक्षा, आयमुलक सीप मुलक आयमुलक तालिमके व्यवस्था करे पर्ना बटैलै । उहाँ कहली, मुक्तकमलरीसे संचालन करल सहकारी चर्पी बनाई नइसेकल हो । पालिकासे चर्पी बनाइक लाग बजेट विनियोजना कैना आग्रह करली ।

माया चौधरी महिला तथा बालबालिका शाखा लैगिंक हिंसा न्यूनिकरणके लाग महिलाहे तालिमके व्यवस्था करठ आव पुरुषहुकनफे सहभागि कराई पर्ना बटैली । राष्ट्रिय मावि विचैपुर विद्यालय व्यवस्थापन समितिके अध्यक्ष नविनकुमार बोहरा डगरमे गैयाभैस बाँधल कारण डगर जिर्ण हुइटी गैल बटैलै । शैक्षिक सुधारमे ध्यान डेहे पर्ना, पालिकाके भवन मजा बनाई पर्ना, नीजि विद्यालय खोलेक लाग अनुमति डेहेबेर सामुदयिक विद्यालयहेफे हेरे पर्ना उहाँ आग्रह करलै ।

नेकपा माओवादी (विपल्प)के करन चौधरी ताल तलैया ठेक्का रकम कहे उठे नइसेकल चासो लेले बटै । रेवन्त बोहरा वडा वडा सार्वजनिक सुनुवाई काहे हुई नइसेकल, गुरगी बाँधके लाग बजेट विनियोजन हुइल मने काम काहे आगे बह्रे नइसेकल कहलै ।
खरुवा खेराके भल्मन्सा राजाराम चौधरी अपन गाउँमे लडियासे कटानी करल मने तटबन्धके व्यवस्था नइरकल बटैलै । कार्यक्रम हुईबेर भल्मन्साहुकन जानकारी नइडेहल, डाइलासिस सेवा नइपाइल, अब्बे बर्खाके कारण डगर हिलाम्यहुके नेगे नइसेक्ना अवस्था रहल बटैलै ।

कार्यक्रममे वडा नम्बर ६ वडा अध्यक्ष प्रेम बहादुर चौधरी पालिकाके बजेटसे विगरल डगरके मर्मत करटी रहल बटैलै । वडा नम्बर ३ वडा अध्यक्ष सन्तराम चौधरी डगरमे गैया गोरु नइबन्धना नियम बनाइल बटैलै । वडा नम्बर ४ वडा अध्यक्ष ठागुराम चौधरी वडाके माग अनुसार खाजा नास्ताके व्यवस्था करल बटैलै ।

ओस्टेक करके शिक्षा शाखाके प्रमुख गणेशप्रसाद मिश्र, लेखा शाखा प्रमुख दिपेन्द्र चौधरी, योजना शाखा प्रमुख सन्तोषकुमार चौधरी, स्वास्थ्य शाखा प्रमुख नरेशकुमार चौधरी, पशु शाखा प्रमुख सूर्य प्रसाद चौधरी, कृषि शाखा प्रमुख मैया चौधरी, महिला तथा बालिका शाखा बालकुमारी चौधरीलगायत शाखाके प्रमुख शाखाके आर्थिक बर्ष २०७९÷०८० के प्रगति विवरण प्रस्तुत करल रहिट । कार्यक्रममे पालिकाभिटर संचालित सक्कु शाखाके प्रगति विवरण प्रस्तुत कैगिल रहे । कार्यक्रममे दिपेन्द्र माविके प्रअ विनोद भट्टराई, पत्रकार अविनाश चौधरी टिप्पणी करल रहिट ।

कार्यक्रममे वडा नम्बर १ के वडा अध्यक्ष धोजहरिपाल बोहरा, २ के वडा अध्यक्ष विकास चौधरी, ३ के वडा अध्यक्ष सन्तराम चौधरी, वडा नम्बर ४ के अध्यक्ष ठागुराम चौधरी, वडा नम्बर ५ के वडा अध्यक्ष विष्णु प्रसाद चौधरी, वडा नम्बर ६ वडा अध्यक्ष प्रेम बहादुर चौधरी, वडा नम्बर ८ वडा अध्यक्ष तारामल कठरिया, कार्यपालिका सदस्य, वडा सदस्य, सामाजिक विकास शाखा प्रमुख यगम कलेल, टमान शाखाके प्रमुख, महिला स्वास्थ्य स्वयं सेविका, पालिकाके कर्मचारी, टमान संघ संस्थाके प्रतिनिधि, यूवा, बुद्धिजिवी, नागरिक अगुवा, भल्मन्सालगायतके सहभागिता रहल रहे । कार्यक्रमके सहजकर्ता पत्रकार एकिन्द्र रहल रहिट । कैलारी गाउँपालिकाके आयोजनामे हुइल कार्यक्रम पहुरा मिडिया प्रालिके सहजीकरणमे हुइल रहे ।