बालबालिकाके सिकाईमे सकारात्मक प्रभावः अध्यक्ष राजसमझ

पहुरा समाचारदाता
धनगढी, २९ असार । कैलारी गाउँपालिकाके अध्यक्ष राजसमझ चौधरी प्रारम्भिक बालविकास कार्यक्रमसे बालवालिकाके सिकाइ तथा समग्र विकासके पक्षमे सकारात्मक प्रभाव परल बटैले बटै ।

‘नेपालमा प्रारम्भिक बालशिक्षा र विकासको सवलीकरणका लागि प्रारम्भिक सिकाइ तथा विकास मापदण्ड कार्यान्वयन परियोजना’ अन्र्तगत प्रधानाध्यापकहुकनसंग प्रारम्भिक बालविकास कार्यक्रम सम्बन्धी हुइल समीक्षा तथा अभिमुखिकरणके समापन कार्यक्रमके बोल्टी उहाँ बाट बटवाइल रहिट ।

शिक्षाहे गाउँपालिका पहिल प्राथमिकतामे धारके काम करटी रहल बा,’ गाउँपालिका अध्यक्ष कहलै, ‘प्रारम्भिक बालविकास कार्यक्रमसे बालवालिकाके सिकाइ तथा समग्र विकासके पक्षमे सकारात्मक प्रभाव परल बा । बालविकास केन्द्रके बसाइ व्यवस्थापन, सिकाइ क्षेत्र व्यवस्थापनमेफे सुधार हुइल ओरसे सक्कु जाने अपन क्षेत्रसे काम कैना आवश्यक बा ।’ कार्यक्रमके वडका पहुना समेट रहल उहाँ गाउँपालिकासे सदैव सहकार्य ओ समन्वय कैना प्रतिवद्धता व्यक्तफे करले बटै ।

पीसविन कैलालीके आयोजनामे युनिसेफ नेपालके आर्थिक सहयोग, सेतो गुराँस राष्टिय वालविकास सेवा केन्द्र तथा कैलारी गाँउपालिकाके सहकार्यमे यिहे असार २८ ओ २९ गते गाउँपालिकाके ४८ ठो सामुदायिक विद्यालयके प्रअ हुकनके सहभागितामे प्रारम्भिक बालविकास कार्यक्रम सम्बन्धी समीक्षा तथा अभिमुखिकरण कार्यक्रम हुइल बा ।

कार्यक्रम मार्फत प्रारम्भिक सिकाइ तथा विकास मापदण्ड परियोजना कार्यान्वयन कैना विद्यालयमे प्रधानाध्यापकहुकनके दायित्व ओ भूमिका, परियोजना अन्र्तगत विद्यालयस्तरमे सञ्चालन करल क्रियाकलाप, प्रगती, समस्या, समस्या समाधानके लाग करल प्रयासके मध्यावर्ती समिक्षाके साथे परियोजना कार्यान्वयनसे आइल सकारात्मक परिवर्तनहे निरन्तरता डेहक लाग अइना योजनाके खाका तयार कैना उद्देश्यसे कार्यक्रमके आयोजना करल पीसविन कैलालीके अध्यक्ष कमला बुढाथोकी बटैली ।

कार्यक्रममे प्रधानाध्यापकहुकनके लाग प्रारम्भिक बालविकास कार्यक्रम तयार करल कार्ययोजनाके समिक्षा परियोजना कार्यान्वयन पश्चात विद्यालय तथा कक्षामे आइल परिवर्तन , सिकाई , चुनौती, क्रियाशिल बालविकास पद्यतिमे आधारित घुम्ती बैठकके अवधारणा, महत्व ओ प्रअ के भुमिका, इएलडियस कार्ड तथा अभिभावक शिक्षाके प्रभाव, विद्यालयके विकासके लाग श्रोतके पहिचान तथा परिचालन विषयके वारेमे छलफल करटी अइना योजनाके बारेमे छलफल करल कार्यक्रमके सहजकर्ता तथा पीसविन कैलालीके जिल्ला कार्यक्रम संयोजक शान्ति मगर बटैली ।

गैल वर्ष वालविकास कक्षामे ४८ से ६० महिनाके बालवालिकाहुकनके सिकाइ तथा विकास मापदण्डके आधारमे करल समग्र प्रगतीके नतिजामे छलफल करटी अइना दिनमे अभिन मजा सुधार करेक लाग प्रअ हुकनकेफे भूमिका महत्वपुर्ण रहल ओरसे प्रारम्भिक सिकाइ तथा विकास मापदण्डमे आधारित क्रियाकलापहे प्रमुखताके साथ आघे बह्रैना छलफल करल उहाँ बटैली ।
ओस्टेक करके कार्यक्रमके सहजकर्ता तथा पीसविन कैलालीके जिल्ला तालिम अधिकृत जानकी सिंह बालविकास कक्षाके समग्र विकासके लाग आवश्यक स्रोतके पहिचान करटी प्रवद्र्धन कैना आवश्यक रहल विषयमेफे विस्तृत रुपमे छलफल कैगिल बटैली । विद्यालयके लाग सबसे बल्गर स्रोत समुदाय तथा अभिभावक रहल ओरसे ओइनहे अधिकतम परिचालन कैना ओ ओइनके सहभागिता बह्रैना खालके क्रियाकलापमे विशेष जोड डेहे पर्ना विषयमे छलफल उहाँ जनैली ।

समापन कार्यक्रममे कैलारी गाउँपालिकाके शिक्षा शाखा प्रमुख गणेश मिश्र विद्यालय अनुगमनके क्रममे बालविकास केन्द्रमे बहुट मजा सुधार हुइल बटैलै । यिहीसे पक्केफे बालवालिका प्रत्यक्ष रुपमे लाभान्वित हुइल बटै, उहाँ कहलै, ‘साझेदार संस्थासे हुइल प्रयास प्रशंसकिय रहल बा । यिहीहे आब स्थानीय सरकारसे प्राथकिता डेके निरन्तरता डेना आवश्यक रहल बा ।’
समुदायस्तरमे सञ्चालन हुइल अभिभावक शिक्षा कार्यक्रमसेफे हम्रहिनहे थप सहयोग पुग्ना कहटी सक्कु जाने यी कार्यक्रममे हातेमालो कैना आवश्यक रहल उहाँ बटैलै ।

कार्यक्रममे सहभागी दिपेन्द्र माविके प्रअ विनोद भट्टराई कार्यक्रम फलदायी रहल बटैलै । हम्रे कुछ मजा काम करेक लागफे बजेटके अपेक्षा करठी,’ उहाँ कहलै ‘मने बजेट विना कैना कामप्रति संवेदन नइहुइल अवस्थामे यी कार्यक्रमसे स्थानीय स्रोतके अधिकतम प्रयोग करटी वालवालिकाके सिकाइमे प्रत्यक्ष सहयोग पुगैले बा ।’

कार्यक्रम लागु हुइलपाछे विद्यालय तथा अभिभावकस्तरमे सकारात्मक प्रभाव करल ओरसे अइना दिनमे यिहीहे प्रभावकारी बनैटी लैजैना उहाँ बटैलै ।

समापन कार्यक्रममे कैलारी गाउँपालिकाके सामाजिक विकास प्रमुख यगम कलेल, पीसविन कैलालीके जिल्ला कार्यसमिति सदस्य, कर्मचारी लगायतके उपस्थिति रहे । यिहीसे आघे उदघाटन कार्यक्रम पीसविन कैलालीके अध्यक्ष कमला बुढाथोकीके अध्यक्षतामे हुइल रहे । कार्यक्रमके संचालन पीसविन कैलालीके सचिव बसुन्धरा भट्ट करल रहिट ।