दुई हजार महुवक टेलुवा लगागिल

पहुरा समाचारदाता
मसुरिया, १ सावन । कैलाली जिल्ला गौरीगंगा नगरपालिका वडा नम्बर ११ मे रहल नुक्लिपुर सामुदायिक होमस्टेके आयोजनामे सोम्मारके रोज महुवक टेलुवा लगागिल बा ।

सव डिभिजन वन कार्यालयके प्राविधिक सहयोय ओ डिभिजन वन कार्यालय धनगढीके सहयोगमे लक्ष्मी सामुदायिक वन उपभोक्ता समुहके ब्लक नम्बर १ मे १.५ हेक्टर क्षेत्रफलमे २ हजार महुवक टेल्वा लगाइल नुक्लिपुर सामुदायिक होमस्टे व्यवस्थापन समितिके अध्यक्ष दिनेश दहित बटैलै । लौव बिउके लाग १० हजार टेलुवा डारगिल बा कलेसे २ हजार टेलुवा लगागिल, आउर लौव महुवक टेलुवा भदौमे वितरण कैना उहाँ जनैलै ।

महुुवक टेल्वा लगैना कार्यक्रममे लक्ष्मी सामुदायिक वनके अध्यक्ष शेरसिंह धामी, सवडिभिजनके सुब्बा अंगानु चौधरी, जिल्ला अदालतके सुब्बा जगदीश चौधरी, नुक्लिपुर गाउँक भल्मन्सा हिंगुराम चौधरीलगायत नुक्लिपुर गाउँके किसानहुकनके सहभागीता रहल रहे ।