सुदूरपश्चिम प्रदेशके तीन जिल्लामे ट्राफिक भायोलेसन रेकर्ड सिस्टम सफटवयेर

पहुरा समाचारदाता
धनगढी, २ सावन । सुदूरपश्चिम प्रदेश अन्तर्गत तीन जिल्लामे ट्राफिक भायोलेसन रेकर्ड सिस्टम सफटवयेर संचालन कैगिल बा ।
सुदूरपश्चिम प्रदेशके कैलाली, कंचनपुर ओ डोटी जिल्लामे ट्राफिक भायोलेसन रेकर्ड सिस्टम सफटवयेर संचालन हुइल हो । सवारी नियम उल्लंघन कसूरके जरिवाना वापत राजश्व संकलनहे प्रदेशगत रूपमे बैंकिङ प्रणालीमे जोरना योजना अनुरूप उ सिस्टम संचालन करल हो ।

नेपाल प्रहरी प्रधान कार्यालय राजमार्ग सुरक्षा तथा ट्राफिक व्यवस्थापन महाशाखासे सातु प्रदेश मातहतके २१ ठो जिल्लामे ‘ट्राफिक भायोलेसन रेकर्ड सिस्टम सफटवयेर’ सावन १ गतेसे संचालनमे आइल बा । उ सिस्टम कोशी प्रदेश अन्तर्गतके सुनसरी, मोरङ ओ झापा, मधेश प्रदेश अन्तर्गतके सिरहा, पर्सा ओ महोत्तरी, बागमती प्रदेश अन्तर्गतके सिन्धुली, काभ्रे ओ मकवानपुर, गण्डकी प्रदेश अन्तर्गतके कास्की, तनहुँ ओ नवलपरासी (पूर्व), लुम्बिनी प्रदेश अन्तर्गतके रूपन्देही, दाङ ओ बाँके, कर्णाली प्रदेश अन्तर्गतके सुर्खेत, सल्यान ओ दैलेखमे ट्राफिक भायोलेसन रेकर्ड सिस्टम सफटवयेर लागू हुइल नेपाल प्रहरी प्रधान कार्यालय राजमार्ग सुरक्षा तथा ट्राफिक व्यवस्थापन महाशाखा जनैले बा ।