‘हरियाली धनगढी’ अभियानमे जन–समर्थन बह्रटी

पहुरा समाचारदाता
धनगढी, २ सावन । दुसरा चरणके ‘हरियाली धनगढी’ अभियानमे जन–समर्थन बह्रटी हरियाली धनगढीहे पाँच दिनमे ४०६ विरुवाके लाग सहयोग हुइल बा ।

उपमहानगरपालिकासे सुरु करल हरियाली प्रवद्र्धन अभियानमे स्वदेश तथा विदेशमे रहल नेपालीहुकनके सहभागिता उल्लेख्य रुपमे बह्रे लागल बा । नेपालके टमान क्षेत्र तथा विदेशमे रहल नेपालीहुक्रे हरियाली धनगढी अभियानमे खुलके साथ ओ समर्थन जनाई लागल बटै ।

उपमहानगरवासीसंगे स्वदेश तथा विदेशमे रहल नेपालीहुक्रेफे यी अभियानमे अपने उपस्थित डेखैना प्रतिस्पर्धा चलल बा । सुदूरपश्चिम प्रदेशके एक ठो उपमहानगर धनगढीसे आघे सारल यी अभियामे सक्कु ओरसे साथ ओ समर्थन जुटे लागल बा । उपमहानगरपालिकाके नगरप्रमुख गोपाल हमाल ओ उपप्रमुख कन्दकला कुमारी रानाहे भेटके हरियाली धनगढीके लाग नगद तथा चेक हस्तान्तरण करुइयाके संख्या बह्रटी बा ।

साथे मुलुकभिटर ओ बाहेर रहल नेपाली हरियाली प्रवद्र्धन कोषमार्फत यी अभियानमे जोरना क्रम जारी बा । उपमहानगरपालिकाके यी अभियानमे जैसिक धनगढीबासीके साथ ओ समर्थन बह्रल बा, ओस्टेक करके स्वदेश तथा विदेशमे रहल नेपालीहुक्रे समेत खुलके साथ ओ समर्थन जनाई लागल बटै । ‘हमार धनगढी हम्रे बनैबी’ अभियानके एक अंश हो हरियाली धनगढी । यी अभियानमे टमान व्यक्ति एवं संघसंस्थासे समर्थन जनैटी धनगढीहे पर्यावरणमैत्री बनैना कार्यमे भारी मदत मिलल नगरप्रमुख हमाल बटैलै ।

हरियाली प्रवद्र्धन करके धनगढीहे पर्यावरणमैत्री सहरके रुपमे स्थापित कैना सुरु करल यी अभियानमे पाँच दिनमे ४ सय ६ ठो विरुवा वृक्षारोपणके लाग सहयोग प्राप्त हुइल बा । यी अभियान अन्तर्गत असार २५ गते ६ लाख ४५ हजार, २६ गते दुई लाख ४० हजार पाँच, २७ गते चार लाख ७५ हजार, २८ गते पाँच लाख २० हजार ६३५ तथा २९ गते एक लाख ५० हजार १० रुप्या करके पाँच दिनमे २० लाख ३० हजार ६५० रुप्या सहयोग प्राप्त हुइल उपमहानगरपालिकाके तथ्यांक बा ।

त्रिनगर भन्सारसे गोदावरी सीमासम ६ लेन सडक अन्तर्गत धनगढी क्षेत्रभिटर वृक्षारोपरण कैना उपमहानगरपालिकासे यैसिन अभियान सुरु करल हो । यी अभियानमे सहभागिता जनैना प्रति विरुवा पाँच हजार शुल्क निर्धारण करल बा । पैसासेफे उपमहानगरपालिकासे सहभागिताके अपेक्षा करल हो ।

उपमहानगरसे सुरु करल यी अभियानमे नगरवासीसे टे खुलके सहयोग ओ समर्थनके साथसाथे अन्य क्षेत्रमे बसोबास कैना तथा टमान देशमे रहल नेपालीहुक्रे करटी आइल सहयोग ओ समर्थनसे उपममहानगरपालिका यी बेला उत्साहित बा । स्वदेश तथा विदेशमे रहल नेपालीहुक्रे डेखाइल साथ ओ समर्थनसे हमार धनगढी हम्रे बनैबी अभियानहे बल पुगल नगरप्रमुख हमाल बटैलै । यी अभियनमे स्कुले बालबालिकासे वृद्ध–वृद्धाके समेत सहभागिता बह्रटी बा ।