कैलालीमे ९५३ मुक्तकमैया पुनस्र्र्थापनासे बञ्चित
पाँँच जिल्लामे अभिन २ हजार ३ सय ७५ जाने पुनस्र्थापना बाँकी
पहुरा समाचारदाता
धनगढी, २ सावन । २३औं मुक्तकमैया दिवस मनैटी रहल बेलाफे कैलालीसे दाङ जिल्लासम अभिन २ हजार ३ सय ७५ जाने मुक्तकमैया पुनस्र्थापनासे बञ्चित हुइल बटै । सरकार कमैयाहुकनहे २०५७ साल सावन २ गते मुक्त घोषणा कैलै रहे ।
मुक्तकमैया महिला विकास मञ्चके संस्थापक अध्यक्ष कौशिला चौधरी कैलालीमे ९५३ जाने मुक्तकमैया पुनस्र्थापनासे बञ्चित हुइल बटैले बटी । जिल्लामे ८ हजार ९ सय ७५ जाने मुक्तकममैया रहलमे ८ हजार २२ जाने जग्गा पैले बटै । सटटा भर्ना ४ सय, परिचय बदर १७३ ओ जग्गा नइपाइल शुद्ध मुक्तकमैया ३८० जाने रहल उहाँ बटैली ।
कञ्चनपुर जिल्लामे ४ हजार ४१८ जाने मुक्तकमैया रहलमे ४ हजार २८९ जग्गा पैले बटै । कलेसे सटटा भर्ना १२९ जाने रहल बटै । बर्दिया जिल्लामे ११ हजार ५५१ जाने मुक्तकमैया रहलमे १० हजार ३०६ जाने जग्गा पैले बटै । ८४ जाने सटटा भर्ना, ८३ जाने जग्गा नइपाइल, १ हजार ७८ जाने करके १२ सय ४५ जाने पुनस्र्थापना बाँकी रहल बटै । बाँके जिल्लामे १९ सय २१ जाने मुक्तकमैया रहलमे १९ सय २१ पुनस्र्थापना हुइल बटै ।
ओस्टेक करके दाङ जिल्लामे ७ सय ५ जाने रहलमे ६५७ जग्गा पाइल ओ ४८ जाने सटटा भर्ना कैना बाँकी रहल बटै । कैलाली, कञ्चनपुर, बर्दिया, बाँके ओ दाङ कैके पाँच जिल्लामे कुल २७ हजार ५ सय ७० जाने मुक्तकमैया रहलमे २५ हजार १ सय ९५ जाने जग्गा भेटासेकल मुक्त कमैया महिला विकास मञ्च जनैले बा ।
ओस्टेक करके मुक्त कमैया महिला विकास मञ्चके आयोजनामे २३औं कमैया मुक्ति दिवसके सन्दर्भममे शुभकामना अदान पदान कार्यक्रममे सुदूरपश्चिम प्रदेशके मुख्यन्यायधिवक्ता कुलानन्द उपाध्याय मुक्तकमैया पूनस्र्थापना संग्गे आवश्यकता अनुसारके सीप प्रदान कैनामे जोड डेहल रहिट । उहाँ कहलै, भौतिक पुर्वाधार लगायत टमान कामके लाग नेपालमे चाहल मेन पावर हम्रे बाहेर देशसे नानटी । यहाँके व्यक्तिनहे उ सीप सिखैलेसे रोजगारीफे प्रदान हुइना ओ अपन देशके पैसा अपने देशमे रही ।
मुक्तकमैया, हलिया आन्दोलनके अगुवा तथा संविधानसभा सदस्य हरि श्रीपाइली मुक्तकमैया आन्दोलन कैलालीसे उठल ओरसे ढेर प्रगती हुइल बटैलै । उहाँ कहलै, कमैया मुक्ती हुइल ढेर बरस हुइल बा । काम नइहुइल कना नइहो । प्रगती हुुइलक हो मने पुनस्र्थापनाके बाँकी सरकारहे हाली सम्बोधन करे परठ । मुक्तकमैया टमान सीप सिखके आघे बह्रल बटैै । आर्थिक संगसंगे राजनितिक क्षेत्रमे अगुवाई करले बटै ।
मुक्तकमैया महिला विकास मञ्चके कार्यक्रम संयोजक इन्द्र चौधरी अब्बे स्वास्थ्य, शिक्षा रोजगारीमे ढेर ध्यान डेहल बटैलै । उहाँ कहलै, मञ्चसे सिटिइभिटीके कक्षामे जोड डेहल बा । कार्यक्रममे पत्रकार मनमोहन स्वाँर, कर्णबहादुर शाह अपन बाट धारल रहिट ।
मुक्त कमैया महिला विकास मञ्चके सीमा चौधरीके अध्यक्षतामे हुइल कार्यक्रमके संचालन कार्यक्रम संयोजक जगदिश राना करल रहिट ।
ओस्टेक करके मुक्तकमैया समाजके केन्द्रीय अध्यक्ष पशुपति चौधरीके अनुसार मुक्तकमैया रहल पाँच जिल्लामे अभिनसम २ हजार ३ सय ७५ जाने पुनस्र्थापनाके अशरा हेरटी रहल बटैलै । कैलालीमे ९५३ जाने, कञ्चनपुरमे १२९ जाने, बर्दियामे १२ सय ४५ जाने, दाङमे ४८ कैकै जाने मुुक्तकमैया पुनस्र्थापना हुई नइसेकल हुइट । कलेसे बाँके जिल्लामे भर पुनस्र्थापनाके काम टुंगो लागल बा ।
संघीयता आइल पाछ मुलुक बडलल, देशक संरचना, व्यवस्था बडलल मने मुक्तकमैयाहुकन अवस्था जस्टक तस्ता रहल मुक्तकमैया समाजके अध्यक्ष पशुपति चौधरी बटैलै ।
संघीयता आइलपाछे २०७५ सालसे मुक्तकमैयाक पुनस्र्थापनाक काम रुकल बा, उहाँ कहलै, संघीयता आघे पुनस्र्थापनाके लाग सरकार बजेट विनियोन करे मने संघीयता आइलपाछे तीन तहके सरकार मन्से केकर जिम्मेवारी रना कना पत्ता नइहो ।
पाँच मन्से बाँकेमे केल पुनस्र्थापना हुइल ओ सब्से ढेर बर्दिया जिल्लामे १२ सय ४५ जाने, कैलालीमे ९ सय ५३ जाने पुनस्र्थापना हुइना बाँकी रहल उहाँ जनैलै ।
दिवसके अवसरमे चार पालिकामे सार्वजनिक विदा
२३औं मुक्तकमैया दिवसके अवसरमे कैलालीके चार पालिकामे आज (मंगर) एक दिन सार्वजनिक विदा डेना निर्णय करले बा ।
टीकापुर नगरपालिकाके नगर कार्यपालिकाके असार ३१ गतेक बैठकके निर्णयसे कमैया मुक्त हुइलक दिनके सम्झनामे सावन २ गते एक दिन सार्वजनिक विदा डेना निर्णय करलक नगर प्रमुख रामलाल चौधरी बटैलै ।
जानकी गाउँपालिकाके प्रमुख प्रशासकीय अधिकृत नारायण बहादुर विष्ट, भजनी नगरपालिकाके नगर प्रमुख केवल चौधरी ओ जोशीपुर गाउँपालिकाके प्रमुख प्रशासकीय अधिकृत मार्शल पन्तहे हस्ताक्षरित सूचना जारी करटी सार्वजनिक विदाके घोषणा करल बटै । सार्वजनिक विदामे पालिका अन्र्तगत रहल वडा कार्यालय, स्वास्थ्य संस्था, शैक्षिक संघ संस्था लगायत सरोकारवाला सम्बद्र्ध सार्वजनिक निकायमे विदा रहना कहल बा ।
