रुपान्तरण कक्षासे बालबालिकाके जीवनमे परिवर्तन
पहुरा समाचारदाता
हसुुलिया, २ चैत । रुपान्तरण कक्षा संचालन हुइलपाछे कैलाली जिल्ला कैलारी गाउँपालिका वडा नं ८ के बालबालिका जीवनमे परिवर्तन आइल बटैले बटै ।
बाल कल्याण संघ टिकापुर ओ वल्र्डभिजन इन्टरनेशनल नेपालके साझेदारीमे सञ्चालित बाल संरक्षण तथा सामुदायिक सहभागिता परियोजना अन्तरगतके रुपान्तरण कक्षासे परिवर्तन नानल साथी शिक्षक अनुराग चौधरी बटैलै । रूपान्तरण कक्षामे सहभागीहुक्रे अपन अनुभव समस्याके आदानप्रदान करके समस्याके दिर्घकालिन समाधान रोज्न, आत्म जागरणसंगे लैङिकता, घरेलु हिंसा, बालविवाह ओ सामाजिक व्यवहारिक बाट सिखल उहाँ बटैलै ।
कैलारी गाउँपालिका वडा नम्बर ८ दुधियामे संचालित रुपान्तरण कक्षाके गाउँपालिका अध्यक्ष राजसमझ चौधरी, उपाध्यक्ष भगवतीकुममारी चौधरी, वडा सदस्य माघुराम चौधरी, प्रमुख प्रशासकीय अधिकृत विरबहादुर ऐर, सामाजिक विकास शाखा प्रमुख यगम कलेल, महिला तथा बालबालिका शाखा प्रमुख बालकुमारी चौधरी लगायतसे रुपान्तरण कक्षाके अनुगमनके क्रममे बालबालिकाहुकनसंग कैगिल अन्तरक्रियाममे ओइने उमेरसंगे शारीरिक तथा मानसिक रुपमे अपनमे अइना समस्या ओ परिवर्तनके बारेमे घर परिवारमे खुलके बटाईबेर परिवारसे सहयोग ओ समाजमे सम्मान मिल्न करल बटैले बटै ।
अपनहे समस्या परेबेर विद्यालयमे संघरीयाहे सुनैना करल सुमत चौधरी रुपान्तरण कक्षामे सहभागी हुइलपाछे अपन परिवारके सदस्यहुकनहे अपने भोगे परल समस्या ओ आवश्यकता टे घरमे बताई परठ कना बुझलै । १६ बर्षके उमेरके उहाँ साप्ताहिक रुपमे संचालन हुइना रुपान्तरण कक्षामे सहभागी हुइलपाछेक अनुभव यैसिक कहलै “ मै विगतके दिनमे टमान बहानामे डाईसे जिद्दी करके मनलग्ना खर्च मग्ना करु अब्बे अतिआवश्यक कामके यथार्थ जानकारी डेके खर्च मग्ना करल बटु खर्च हुके बचल पैसा खुत्रुकेमे धरठु । यैसिक करलेबेर मोर बाबा डाईहे विश्वास करठै “ चौधरी बटैठै ।
रूपान्तरण कक्षामे बाल अधिकार, बाल विवाह, बालश्रम, यौन हिंसा, घरेलु हिंसा, व्यावसायिक तालिम, यौन तथा प्रजनन स्वास्थ्य ओ नागरिक सहभागिता जैसिन व्यवहारिक बाट सिखल आस्मा चौधरी बटैली ।
अन्तरक्रियामे गाउँपालिका अध्यक्ष राजसमझ चौधरी कैलारी गाउँपालिका सीमानाकासे जोरल ओरसे लागु औषधके कुलटमे बालबालिका फस्टी गैल ओरसे रुपान्तरण कक्षासे दैनिक जीवनमे सकारात्मक परिवर्तन आइल बटैलै । उहाँ कहलै, यी पालिकामे कुलटसे फसल, बालविवाहके मुद्दा ढेर बा । रुपान्तरण कक्षा मजा बा, पालिकाके और वडामेफे संचालन कैना जरुरी बा । बालबालिकामे लगानी कैना खर्च नइहो, भविष्यके लाग आम्दानी हो, अध्यक्ष कहलै ।
गाउँपालिका उपाध्यक्ष भगवतीकुमारी चौधरी बालबालिका उमेर बह्रलसंगे शारिरीक परिवर्तन अइना ओरसे जीवन उपयोगी सीप आवश्यक रहल बटैली । उहाँ कहली, बालबालिकाहुकन उमेर बह्रलसंगे शारिरीक परिवर्तन हुइठ । जौन बेला उ उमेरके बालबालिका जीवन उपयोगी सीप अनिवार्य रहठ । जौन रुपान्तरण कक्षासे पुरा करले बा ।
अनुगमन कार्यक्रममे प्रमुख प्रशासकीय अधिकृत विर बहादुर ऐर, सामाजिक विकास अधिकृत यगम कलेल, महिला तथा बालबालिका शाखा प्रमुख बालकुमारी चौधरी रुपान्तरण कक्षासे बालिकामे सकारात्मक प्रभाव परल कहटी अपन सिखल सीप और बालबालिकाहुकन सिखाई पर्नामे जोड डेहल रहिट ।
ओस्टेक करके अइना दिनमे बाल कल्याण संघ टिकापुर ओ वल्र्डभिजन इन्टरनेशनल नेपालके साझेदारीमे सञ्चालित बाल संरक्षण तथा सामुदायिक सहभागिता परियोजनाके काम आघे बह्राईबेर पालिकासे समन्वय कैके आघे बह्रना सुझाव डेहल रहिट ।
बाल कल्याण संघ टीकापुरके फिल्ड अधिकृत परशुराम चौधरी १३ से १८ बर्ष उमेर समुहके २५ जाने बालबालिका सहभागी रहल बटैलै । रुपान्तरण कक्षा संचालनपाछे सहभागी विद्यार्थीहुक्रे शिक्षक, अभिभावकसे खुल्के प्रश्न पुछे सेक्ना ओ अपने रुपान्तरणसंगे समाज रुपान्तरणमे लाग बटैलै ।
कार्यक्रममे बाल कल्याण संघके सहजकर्ता प्रेम चौधरी अब्बे समयके माग अनुसार सक्षम ओ योग्य नागरिक बनैना बालबालिकाके क्षमता वृद्धि कैना रुपान्तरण कक्षामे महत्वपूर्ण योगदान रहल बटैलै ।
