धनगढीके एक्सिस विद्याश्रमहे सिंगापुरमे बेस्ट स्कुल अवार्ड प्रदान

पहुरा समाचारदाता
धनगढी, ४ सावन । धनगढी ५ हसनपुरमे रहल एक्सिस विद्याश्रम सिंगापुरमे बेष्ट स्कुल अवार्ड २०२३ से सम्मानित हुइल बा । एक्जिटो एजुकेसन अष्ट्रेलियाके आयोजना, एक्जिटो इभेन्ट्सके व्यवस्थापन तथा अनुजा मिडिया नेपालके संयोजनमे सिङ्गापुरमे सम्पन्न कार्यक्रममे एक्सिस विद्याश्रमहे बेष्ट स्कुल प्रदान करल हो ।

सिंगापुरमे आयोजित एक्जिटो इन्टरनेशनल एक्सिलेन्स अवार्ड २०२३ मे नेपालके शिक्षा क्षेत्रमे योगदान डेहल ३३ जाने स्कुल सञ्चालक तथा स्कुलहे सम्मान करल रहे । उहे कार्यक्रममे एक्सिस विद्याश्रमके प्रिन्सिपल अनिता पन्तहे बेष्ट स्कुल अवार्ड प्रदान करल हो ।

उक्त कार्यक्रममे एक्सिस विद्याश्रमके प्रिन्सिपल पन्त, कैलाली मोडेल माविके प्रधानाध्यापक तपेन्द्र सिंह, मालिका ईंग्लिश स्कुलके प्रिन्सिपल सिबी चन्दसहित धनगढीके तीन जाने विद्यालय सञ्चालक तथा प्रिन्सिपल सम्मानित हुइल रहिट । सिङ्गापुरमे आयोजित विशेष कार्यक्रममे बर्का पहुना रहल लिंकन युनिभर्सिटीके प्रो चान्सलर प्रोफेसर दातुक डाक्टर हज्जा बीबी फेलिरना अब्दुलहा ओ एक्जिटो एजुकेसनके निर्देशक सचेत वीदीजन संयुक्त रुपमे अवार्ड प्रदान करल रहिट ।

कार्यक्रममे नेपालभरसे छनोटमे परल टमान स्कुल, कलेज, तथा स्कुल सन्चालक तथा प्रिन्सिपलहे शिक्षा क्षेत्रके विकासमे पुगाइल योगदानके कदर कदर कैटी अवार्ड प्रदान करल रहे ।