प्राकृतिक सम्पदा संरक्षणसे केल जलवायू परिवर्तन न्यूनिकरणः गापा अध्यक्ष
पहुरा समाचारदाता
हसुलिया, ४ सावन । जलवायू परिवर्तनके असरसे बाँचेक प्राकृतिक सम्पदाके संरक्षण आवश्यक रहल कैलारी गाउँपालिकाके अध्यक्ष राजसमझ चौधरी बटैले बटै ।
यू्एसएआइडी जल जंगल (सामुदायका लागि प्रकृति संरक्षण र स्वास्थ्य परिस्थितिक प्राणली) के आयोजनामे विफेक रोज सरोकारवाला निकायविच हसुलियामे हुइल अन्तरक्रिया कार्यक्रमके वडका पहुना समेट रहल गाउँपालिका अध्यक्ष उ बाट बत्वाइल रहिट । उहाँ कहलै, पहिले पहिले समयमे पानी बरसे, जार गर्मीफे मौसम ठिकठिके रहे । जलवायू परिवर्तनसे अब्बे बेमौममे पानी बरसटी बा । जार घटटी गैल पृथ्वीके तापक्रम बह्रटी गैल बा । पहिलेक तुलनामे उत्पादनफे हेरैटी गैल बा ।
जलवायू परिवर्तनसे जल जंगलमे भारी असर परटी रहल कारण ओकर असर मानव, जीवजन्तुमे प्रत्यक्ष रुपमे डेखल अध्यक्ष बटैलै । प्लाष्टिक जन्य वस्तुसेफे बोट विरुवा लगायत मानव जीवनमे असर पारल कारण प्लाष्टिक जन्य वस्तु अन्त्य करे पर्नामे उहाँ जोड डेलै ।
कार्यक्रमके विशिष्ट पहुना गाउँपालिका उपाध्यक्ष भगवतीकुमारी चौधरी पर्यटक स्थलमे प्लाष्टिक जन्यबस्तु जथाभवी फेकल कारण वातावरण फोहोर हुइल बटैली । उहाँ कहली, पर्यटक स्थलमे पिकनिक खाई जैना करठै । प्लाष्टिक बोटल, वियर खाई पियल बोटल जथाभवी फेकल कारण वातावरण प्रदुशन बह्रल बा ।
वन जंगल जोगैनामे महिलनके भारी योगदान रहल मने विनाश हुइलेसे सबसे ढेर असर महिला, बालबालिका, बृद्धबृद्धा, अपांगता रहल व्यक्ति परल उहाँ बटैली । जलबायू परिवर्तनसे अब्बे पहिलेक जीवजन्तु हेरैटी, मानव जीवनमे भारी परिवर्तन हुइलफे उपाध्यक्ष बटैली । सिमसार क्षेत्र ठेक्का पटटा देहल कारण चिरैचुरंगनके बास स्थानफे मस्ती गैलफे उहाँ जनैली । महिलाहुक्रे दुना टपरी बनाके जीवन निर्वाह करे लागल मने बनुवामे लुकरी लागके दुना बनैना पटियाफे नइमिल्ना अवस्था आइल उहाँ बटैली ।
कार्यक्रममे वडा नम्बर ७ वडा अध्यक्ष गाउँपालिका प्रवक्ता दिपेन्द्रबहादुर बम जलवायू परिवर्तनके असरसे बाँचेक लाग बनजंगल संरक्षण संगे वृक्षरोपणमे जोड डेहल रहिट । कार्यक्रममे वडा नम्बर ४ के वडा अध्यक्ष तथा वन वातावरण समितिके संयोजक ठागुराम चौधरी, गाउँपालिकाके प्रमुख प्रशासकीय अधिकृत विरबहादुर ऐर, सामाजिक विकास शाखा प्रमुख यगम कलेल, स्वास्थ्य शाखा प्रमुख नरेशकुमार चौधरीलगायत टमान शाखाके प्रमुख, कार्यपालिका सदस्य, टमान सामुदायिक वनके पदाधिकारीहुकनके सहभागिता रहे । कार्यक्रममे सहजीकरण यू्एसएआइडी जल जंगल परियोजनाके टिम लिडर भाष्कर भटराई ओ जेसि अफिसर लोकबहादुर नेपाली करल रहिट ।
