विपद पूर्व तयारी तथा प्रतिकार्य कैना प्राथमिक उपचार सम्बन्धी तीन दिने तालिम सुरु
पहुरा समाचारदाता
हसुलिया, ४ सावन । कैलालीके कैलारी गाउँपालिका स्थित हसुलियामे विफेक रोजसे विपद पूर्व तयारी तथा प्रतिकार्य कैना प्राथमिक उपचार सम्बन्धी तीन दिने तालिम सुरु हुइल बा ।
सृजनशिल समाजको सृजना (सिसिएस) कैलालीसे आर्थिक विकास मार्फत जोखिम व्यवस्थापन (एमरेड) परियोजना अन्र्तगत तीन दिने तालिमके सुरुवाट हुइल हो । कैलारी गाउँपालिकाके अध्यक्ष राजसमझ चौधरीके वडका पहुना ओ गाउँपालिका उपाध्यक्ष भगवतीकुमारी चौधरीके विशिष्ट पहुनामे तालिमके उदघाटन हुइल रहे ।
उदघाटन कार्यक्रममे गाउँपालिका अध्यक्ष अब्बे ढेर विपद आइसेक्ना मौसम रहल ओरसे सबजाने सचेत ओ तयारीके साथ बैठना आवश्यक रहल बटैलै । उहाँ कहलै, विपद कब आइ कना कौनो पत्ता नइरहठ । बर्खाके बेला हुइल ओरसे बाढ, डुवान ओ कटान हुइसेक्ना ओरसे विपदसे हुइना जोखिम न्यूनिकरणके लाग प्राथमिक उपचारबारे जानकारी पैना जरुरी रहल बटैलै ।
गाउँपालिका उपाध्यक्ष भगवतीकुमारी चौधरी कैलाली जिल्लाके कैलारी गाउँपालिका, भजनी नगरपालिका, जोशीपुर ओ टीकापुर बाढ जन्य विपदके ढेर जोखिममे रहल बटैली । उहाँ कहली, आघेक बरस भजनीके धनजनके समेट क्षति हुइल ओरसे विपदसे बच्ना पूर्व तयारी आवश्यक रहठ । उहाँ तालिमके सफताके शुभकामना व्यक्त करटी करटी तालिमके ज्ञानसीप व्यवहारमे उटरना आग्रह करली ।
सृजनशिल समाजको सृजना (सिसिएस) कैलालीसे अध्यक्ष प्रकाश विष्टके अध्यक्षतामे हुइल कार्यक्रमके संचालन सहजकर्ता मिना चौधरी करल रहिट । कार्यक्रममे वडा नम्बर ७ के वडा अध्यक्ष दिपेन्द्र बहादुर बम, वडा नम्बर ३ वडा अध्यक्ष सन्तराम चौधरी, गाउँपालिकाके विपद व्यवस्थापन शाखाके फोकल पर्सन भुवन बखरिया, भजनी, जोशीपुर, टीकापुरसे सिसिएसके सदस्य, प्राथमिक उपचार केन्द्रके सदस्यहुकनके सहभागिता रहल बा ।
