सहिद गुम्राके शालिक गुमराहमे

सन्तोष दहित
घोराही, ६ सावन । चलनचल्तीके नाममे ट्राफिक चोक । घोराही उपमहानगरपालिकासे नामाकरण करल नाम गुम्राचोक । उहे चोकमे फेरसे उपमहानगरसे घोडुवाके प्रतिमा धारल ।

घोडुवाके प्रतिमासे करिब सय मिटर पश्चिम–उत्तर कोनुवामे किसान नेता सहिद गुम्रा थारुके शालिक बा मने शालिकके नाम निशाना नइविल्गाइठ । गुम्रा थारुके शालिक केल नाही घोडुवा धारलपाछे टे गुम्रा चोक गुमराहमे परल बा ।

गुम्रा थारु किसान आन्दोलनके योद्धा रहिट । जौन योगदान गुम्राके बा किसान आन्दोलनमे ओसिक उहाँके सम्मान हुई नइसेकल महेन्द्र बहुमुखी क्याम्पस दाङके उपप्राध्यापक सुदीप गौतमके कहाई बा । ‘गुम्रा थारु किसान सहिद केल नइहुके दाङके प्रथम सहिद हो’– गौतम कहलै– ‘मने जौन हिसाबसे उहाँके सम्मान हुई पर्ना रहे उ अभिनफे हुई नइसेकल हो । एक ठो कोनुवामे शालिक बनाके गुम्रा थारुके सम्मान हुई टे ?’

के हुइट गुम्रा थारु

घोराही–३ बेलुवाके कालुराम थारूके मंझला छावा रहिट गुम्रा थारू । १९८२ सालमे जन्मल गुम्रा किसान संघके सदस्य हुके किसानहुकनके पक्षमे सशक्त आवाज उठैना क्रान्तिकारी किसान योद्धा रहिट । कम्युनिष्ट पार्टीके किसान नेता बयरबटुवाके ढाँटु चौधरी, गैरागाउँके मोतीलाल चौधरी, बर्गद्दीके नारायणप्रसाद शर्मा, माणिकलाल गौतम, मानबहादुर, फुलपाती, चुके, पिठु, बहादुर, क्रिमलाल, ऋषि चौधरी, अशोक चौधरीलगायत नेता संगसंगे गाउँ–गाउँमे किसानहुकनहे संगठित बनैना काम करलै । किसानके पक्षमे संघर्ष करटी करटी गुम्राथारु ३५ वर्षके उमेरमे सहिद हुई पुगलै । २०१७ साल साउन ६ गतेके दिन तत्कालीन सरकारके निर्देशनमे खेत जोटेबेर प्रहरीसे गुम्रा थारुके हत्या करल रहे ।

कैसिक हुइल रहे घटना

तत्कालीन नेपाल कम्युनिष्ट पार्टी दाङके संस्थापक सचिव एवं वरिष्ठ पत्रकार नारायणप्रसाद शर्माके अनुसार दाङमे जमिन्दारविरुद्ध किसान आन्दोलन हुइल रहे । किसान संघके अगुवाइमे झण्डे १० वर्षसम हुइल किसान आन्दोलन उत्कर्षमे पुगल । उहे आन्दोलनके क्रममे २०१७ साल सावन ६ गतेके दिन जमिन्दारहुक्रे वर्षातके समयमे खेत जोटे नइडेहलपाछे जबर्जस्तरूपमे किसानहुक्रे खेतुवा जोटे लग्लै । जमिन्दार ओ प्रहरीसे रोके खोज्टी खोज्टीफे खेतुवामे हर जोटटी रहलपाछे प्रहरीसे गुम्रा थारुउप्पर गोली चलाइल । जोत्टी जोत्टी गुम्रा थारुके खेतुवामे निधन हुइल ।
६२ औं स्मृति दिवस
यिहे बीच सहिद किसान नेता गुम्रा थारुके ६२ औं स्मृति दिवस दाङलगायत टमान ठाउँमे टमान कार्यक्रम कैगिल बा । नेकपा एमाले दाङ ओ अखिल किसान महासंघसे संयुक्तरूपमे सहिद थारुके स्मृति दिवसके अवसरमे अन्त क्र्रिया, थारुके शालिकमे माल्यार्पण कार्यक्रम कैगिल नेकपा एमाले घोराही नगरके अध्यक्ष भुवन चौधरी बटैलै ।