विपिके सिद्धान्त ओ विचारमे आघे बह्रना जोड

पहुरा समाचारदाताा
धनगढी, ६ सावन । नेपाली काँग्रेसके संस्थापक नेता, पहिल जननिर्वाचित प्रधानमन्त्री विपि कोइरालाके ४१ औं विपि स्मृति दिवस देशभर टमान कार्यक्रम कैके मनागिल बा ।

बिपि स्मृति दिवसके अवसरमे नेपाली काँग्रेस कैलारी गाउँपालिकाके आयोजनामे वडा नम्बर ८ मे टेढी सिचाई आयोजनामे शुभकामना अदान प्रदान तथा वृक्ष रोपण कार्यक्रम कैगिल बा ।

शुभकामना अदान प्रदान कार्यक्रमके वडका पहुना रहल कैलारी गाउँपालिकाके अध्यक्ष राजसमझ चौधरी विपी कोइरालाके सिद्धान्त ओ विचारहे आत्मसात कैके आघे बह्रना बटैले बटै । जौन बेला मुलुक राजनितिक संकटमे परल रहे उहीहे बचैनामे विपी कोराइराके भारी योगदान रहे, उहाँ कहलै, विपिके योगदानसे मुलुकमे उत्पन्न संकट टरल रहे । अब्बे विपिके नाउँ भजा जाइटा मने ओकर सिद्धान्त ओ विचार अनुसार कोईफे आघे नइबह्रल हुइट ।’

विपिके नाउँसे देश टमान कार्यक्रसहिट वृक्षारोपण कैगिल बा । यी टेलुवाहे जिवैना ओ संरक्षण आवश्यक रहलफे उहाँ बटैलै । यिहे अवसरमे कैलारीके टमान ठाउँमे बर्खाके कारण डगर विगरल ओरसे सम्बन्धित वडा कार्यालयके ध्याननकर्षण करैटी तुरुन्त मर्मत कैना निर्देशनफे डेलै ।

शुभकामना अदान प्रदान कार्यक्रममे संविधान सभा सदस्य तथा प्रदेशसभाके निवर्तमान प्रदेश सदस्य विरमान चौधरी विपि कोइराला समाज परिवर्तनके बाहक रहल बटैलै । विपि कोइराला कुहीहे विभेद नइकैना सक्कु जानेक समान सहभागिताके सिद्धान्त अनुसार मुलुक आघे बह्रलेसे कबु द्वन्द सृजना नइहुइना उहाँ बटैलै । उहाँ १२ बुदें सम्झौतामे लिखित कुछ बुदा अभिन कार्यान्वयन नइहुइलफे बटैलै । विकासके लाग सक्कु दल एक ठाउँमे अइनाफे उहाँ जोर डेहल रहिट ।

नेपाली काँग्रेस कैलालीके उपसभापति खेमराज डगौरा थारु विपिके नाउँमे लगाइल टेलुवाहे संरक्षण संगे विपिके सिद्धान्त अनुसार आघे बह्रनामे जोर डेहल रहिट । देश गम्भीर अवस्थामे गुज्रटेहे उहाँ कहलै, विपि कोईराला राजा रजौटेहुकनसंग घेँचा मिलाके देशहे बाँचैना काम करल बटैलै । २०३७ सालमे विपि कोइराला गौरीफन्टा नाका हुइटी कैलाली आके कार्यक्रममे बोलल बाटहे स्मरण करटी उहाँ देशमे कोई जाती, वर्ग, समुदायके सम्मान हक रहल ओरसे कुहीहे विभेद नइकैना कहल रहिट ।

नेपाली काँग्रेस कैलालीके जिल्ला सचिव केशव मिश्र जौन बेला देश संकटमे परल रहे, उ बेला विपि कोइरालासे मजा भुमिका निर्वाह करल बटैलै । राप्रपा नेपालके जिल्ला अध्यक्ष तथा टेढी सिचाई आयोजनाके सल्लाहकार होमबहादुर गुरुङ विपिके महान विचारके कारण आजसम चर्चा पाइल बटैलै । उहाँ कहलै, विपिके नाउँ लेना मने उहाँके सिद्धान्त ओ विचार विस्राई लगाल बा ।

कार्यक्रममे स्वागत मन्तव्य कैलारी गाउँपालिका वडा नम्बर ८ के वडा अध्यक्ष तारामल कठरिया ओ संचालन नेपाली काँग्रेस कैलारी गाउँपालिकाके सभापति कृष्ण प्रसाद चौधरी करल रहिट । शुभकामना अदान प्रदानपाछे टेढी सिचाई आयोजनाके प्रागाङमे लिपटिस लगायतके टमान जातके टेलुवा लगागिल बा । कार्यक्रममे नेपाली काँग्रेस तथा नेपाली काँग्रेसके भातृ संगठनके प्रतिनिधिहुकनके सहभागितामे वृक्षारोपण कैगिल बा । ओस्टेक करके कैलारी गाउँपालिका वडा–८ मेफे बृक्षा रोपण कैगिल बा ।

धनगढी उपमहानगरपालिकाके आयोजनामे वृक्षारोपण

ओस्टेक करके विपिप्रति श्रद्धा सुमन अर्पण करटी विपि स्मृति दिवसमे नेपाली काँग्रेस धनगढी उपमहानगरपालिकाके आयोजनामे वृक्षारोपण कार्यक्रम कैगिल बा ।

नगर सभापति यज्ञराज उपाध्यायके सभापतित्वमे हुइल कार्यक्रममे नेपाली काँग्रेस कैलाली जिल्ला सभापति नारायणदत्त भट्ट, प्रतिनिधि सभा सदस्य डिल्लीराज पन्त, पुर्वराज्य मन्त्री टेकबहादुर रैका, पार्टीके प्रदेश सदस्य गजराज पाण्डेय, टेकराज जोशी, पुष्पा भट्ट लगायत नेता कार्यकर्ताके उल्लेख्य सहभागीता रहल रहे ।

तरुण दलसे विमारीहुकन फलफूल वितरण ओ वृक्षरोपण

नेपाल तरुण कैलालीसे सेती प्रादेशिक अस्पतालका विरामीहुकनहे फलफुल करले बा ।

४१र्औ विपि स्मृतिके अवसर पारके सेती प्रादेशिक अस्पतालमे उपचार करैटी रहल १०० जाने विरामीहुकनहे फलफुल वितरण करल जिल्ला अध्यक्ष दिपेन्द बहादुर बम जनैलै ।

विपि स्मृति दिवस केन्द्रीय तालिका अनुसार टमान कार्यक्रम कैके मनैटी रहल उहाँ जानकारी डेलै । विगतके बर्षमे वृक्षरोपण, रक्तदान कार्यक्रम करलफे उहाँ जनैलै । फलफुल वितरण कार्यक्रममे नेपाल तरुण दलके केन्द्रीय सदस्य तेज खडका, अमृत विसिलगायत तरुण दलके पदाधिकारी, नेपाली काँग्रेसके भातृ संगठनके टमान संघ सस्थाके प्रतिनिधि, नेपाल विद्यार्थी संघलगायतके सहभागिता रहल रहे ।

ओस्टेक करके तरुण दलके आयोजनामे बृक्षारोपण कैगिल जिल्ला अध्यक्ष दिपेन्द्रबहादुर बम बटैलै ।

घोडाघोडीमे वृक्षारोपण सहित ४१ औँ विपी स्मृति दिवस मनागिल

जन नायक विपी कोइरालाके ४१ औँ स्मृति दिवसके अवसर पारके नेपाली काँग्रेस घोडाघोडी नगर कार्यसमितिसे शनिच्चरे रोज बृहत् वृक्षारोपण कार्यक्रम कैगिल बा । नगरपालिकाके वडा नम्बर ४ जनकपुर स्थिति मेलघट्टी सामुदायिक वन परिसरमे टमान जातके बोटबिरुवा लगागिल हो ।

नेपाली काँग्रेस घोडाघोडी नगर कार्यसमितिके सभापति बमबहादुर सिंहके सभाध्यक्षमे हुइल कार्यक्रममे वडका पहुना नेपाली काँग्रेस कैलाली जिल्ला सदस्य तथा नगर उप प्रमुख गुलिया कुमारी चौधरी रहल रहिट ।

बृहत् वृक्षारोपण कार्यक्रममे वडा सभापति, महाधिवेशन प्रतिनिधि, वडा अध्यक्ष, पालिका भरके अधिकांश नेता, कार्यकर्ता ओ तरुण दल तथा नेपाल विद्यार्थी संघके विद्यार्थी नेता एवम् पार्टीमे आस्थावान् शुभेच्छुकहुकनके सहभागिता रहल रहे । कार्यक्रममे नगर कमिटी सदस्य प्रर्भुजन शाहीके स्वागत मन्तव्य ओ नगर कमिटी सदस्य आयुश जोशी कार्यक्रम संचालन करल रहिट ।