ज्योति विकास बैंकसे बार्षिकोत्सवके अवसरमे रक्तदान कार्यक्रम
पहुरा समाचारदाता
हसुलिया, ९ सावन । ज्योति विकास बैंक हसुलिया शाखासे अपन १५औं वार्षिकोत्वसके अवसरमे मंगरके रोज रक्तदान कार्यक्रम करले बा ।
कैलारी गाउँपालिका वडा नम्बर १ के वडा अध्यक्ष धोजहरिपाल बोहराके प्रमुख आतिथ्यमे हुइल एक कार्यक्रमके विच ज्योति विकास बैंकसे अपन वार्षिकोत्सव मनैटी नेपाल रेडक्रस सोसाइटी कैलारी उपशाखाके समन्वयमे रक्तदान कार्यक्रम करल हो । रक्तदान जीवनदान कहटी सामाजिक उत्तरदायित्व बहन करटी १५औं बार्षिकोत्सव रक्तदानके कार्यक्रमके आयोजना करल मनागिल बैंकके हसुलिया शाखा प्रमुख विनोद प्रसाद फुलारा बटैलै ।
रक्तदान कार्यक्रममे वडका पहुना वडा अध्यक्ष धोजहरिपाल बोहरा, बैंकके हसुलिया शाखा प्रमुख विनोद प्रसाद फुलारा, बैंकके कर्जा विभाग प्रमुख तारादत्त पन्त, नेपाल रेडक्रस सोसाइटी कैलारी उपशाखाके सभापति श्रीराम चौधरीलगायतसे रक्तदान करले बटै । बैंकसे सामाजिक सुरक्षा भत्ता वितरण, कृषि कर्जा, अनुदान कर्जा, बचत तथा मुद्धती खाता संचालन करके सेवाग्राहीहुकनहे सेवा प्रदान करटी आइल शाखा प्रमुख बटैलै ।
बैंकके वार्षिकोत्सव तथा रक्तदान कार्यक्रममे वडा नम्बर ३ के वडा अध्यक्ष सन्तराम चौधरी, बैंकके कर्जा विभाग प्रमुख तारादत्त पन्त, वडा सदस्य तुल्सी प्रसाद चौधरी, कैलारी उद्योग वाणिज्य संघके अध्यक्ष नेपालु चौधरीलगायतके सहभागिता रहे ।
