कृषक बडायकहे प्रदेशके सर्वोत्कृष्ट पुरस्कार

पहुरा समाचारदाता
धनगढी,१० सावन । बहुप्राविधिक रुपमे कृषि खेती करटी आइल कञ्चनपुर बेलौरी नगरपालिका– ६ के असारेराम बडायकहे प्रदेशके सर्वोत्कृष्ट पुरस्कार प्रदान कैगिल बा ।

बडायकहे प्रमाणपत्र ओ रकमसहित सर्वोत्कृष्ट पुरस्कार सुदूरपश्चिम प्रदेशके मुख्यमन्त्री कमलबहादुर शाह हस्तान्तरण करल हुइट । भुमि व्यवस्था, कृषि तथा सहकारी मन्त्रालयसे हरेक वर्ष सर्वोत्कृष्ट तथा उत्कृष्ट कृषकहे वितरण करटी आइल बा । यी बरसके बडायक सर्वोत्कृष्ट कृषक हुइल उहाँहे नगद एक लाख ५० हजार कैगिल बा ।

उखु खेतीसंगे छरुवा धान खेती, आलु लगायतमे टमान प्रविधि प्रयोग करके उहाँ विगत १२ वर्षसे ढेर समयसे कृषि खेतीमे लागल बटै । उहाँ कहलै –‘मन्त्रालयसे सर्वोत्कृष्ट कृषकसे सम्मान करेबेर खुशीसहित कृषि खतीओर जिम्मेवारी थपल महशुस हुइल बा ।’

ओस्टेक मन्त्रालयसे नगद ७५ हजारसहित प्रमाणपत्र वितरण करटी प्रदेशके चार कृषकहे उत्कृष्टके रुपमे सम्मान करले बा । सम्मानित हइलमे कैलालीके पहलमान देउवा, डडेल्धुराके प्रिन्सराज अवस्थी, प्रशान्त अवस्थी ओ जयन्ती भाट रहल बटै ।

सम्मान ग्रहण करटी सम्मानित हुइना कृषक अभिनफे कृषक व्यवसायिक हुई नइसेकल गुनासो करले रहिट । ओइने बैंकसे ऋण प्रवाह नइकैना, समयमे मल खाद नइपैना, सिचाइ अभाव, उत्पादन हुइलेसेफे बजारीकरण नइहुइनो, तरकारी भण्डरण केन्द्र अभाव लगायतके समस्या कृषकसे भोगे परल गुनासो करले रहिट ।

कार्यक्रममे प्रदेशके मुख्यमन्त्री कमलबहादुर शाह युवाहे कृर्षि ओर आकर्षण करैलेसे केल पहाडके बाँझ खेतमे अन्नबाली उब्जनी सहज हुइना बटैलै । उहाँ कहलै –‘समग्र सुदूरपश्चिम प्रदेश समृद्धिके बाट करटी रहेबेर कृषि क्षेत्रहे अलग राखे नइसेक्जाई । पूर्वाधार, पर्यटन, जलस्रोतसंगे कृषिसेफे प्रदेश समृद्धिके सम्भावना बोकल बा ।’

उहाँ सरकारसे कृषिमे लगानी करलेसेफे सोचलअनुसार प्रतिफल आई नइसेकल बटैलै । उहाँ कहलै –‘विउविजन, मलखाद, अनुदान, सिँचाइ सुविधा लगायत कृषिमे टमान लगानी हुइलेसेफे सोचल अनुसारके प्रतिफल आई नइसेकल हो । कहु सरकारके व्यवस्थापनमे कमजोरी हुके यी अवस्था आइल हो की यम्ने हम्रे फे सोच्न जरुरी बा । सरकारसे प्रतिफल अइएना करके कृषकमे लगानी करे परठ ।’ अब्बेक प्रदेश सरकारके उहे सोचके आधारमे आघे बह्रल उहाँक कहाई बा । ‘कुहीहे व्यक्तिगत फाइदा पुग्न करके कौनो फर्म वा संस्थामे सरकारके बजेट विनियोजन हुई नइपरल । यदि ओसिन पैलेसे कार्यान्वयन नकरबी ।’

गन्यापधुरा गाउँपालिकाके अध्यक्ष इन्द्र कार्की कृषिओर सक्कुहुनहे आकर्षण करैना अभियानमके रुपमे आघे बढाई पर्ना सुझाव डेलै ।

भुमि व्यवस्था, कृषि तथा सहकारी मन्त्रालयके सचिव मदनसिंह धामीके अध्यक्षतामे हुइल कार्यक्रममे स्वागत तथा उद्देश्यबारे कृषि विकास निर्देशनालयके निर्देशक यज्ञराज जोशी जानकारी करैले रहिट ।