डेंगु नियन्त्रण अभियानहे प्रभावकारी बनाई

बर्खासंग्गे डेंगु संक्रमितके संख्या हवाटे बह्रल बा, सुदूरपश्चिम प्रदेशके सक्कु जिल्लामे डेगु रोगके संक्रमण डेखा परल बा कलेसे कुछ जिल्लामे संक्रमणदर एकफाले बह्रल बा । यी बरस प्रदेशमे जुलाईसमके तथ्यांक हेर्ना हो कलेसे ३ सय १८ जाने संक्रमित पुगसेकल बटै । नौ जिल्लामे सबसे ढेर दार्चुलामे १९०, कञ्चनपुरमे ५२, अछाममे ३१, कैलालीमे २३, डोटीमे, बैतडीमे ५÷५ जनहनमे, बझाङमे ६, बाजुरामे ४, डडेल्धुरामे २ जनहनमे डेंगु संक्रमण डेखा परल बा । कुछ दिन यहोर डेंगु संक्रमण जोरसे बह्रल बा, कलेसे जुलाई महिनाके तथ्यांक हेरेबेर कञ्चनपुरमे संक्रमण बृद्धि दर उच्च डेखल बा । यी जिल्लामे जुन महिनामे जम्मा ५ जनहनमे केल संक्रमण डेखल रहे । कलेसे जुलाई महिनामे १८ जनहनमे संक्रमण डेखल बा ।
सुदूरपश्चिम प्रदेशके कैलाली ओ अछाम जिल्लामेफे डेंगु संक्रमण उच्च डेखल बा । जुन महिनामे कैलालीमे ४ जनहनमे ओ अछाम महिनामे ६ जनहनमे यी रोग संक्रमण डेखल रहे । कलेसे जुलाई महिनामे कैलालीमे १३ ओ कञ्चनपुरमे १५ जनहनमे डेंगु संक्रमण डेखल बा । सुदूरपश्चिममे सन २०२३ के जनवरी महिनामे १५ जनहनमे, फेबु्रअरी महिनामे ५२, मार्च महिनामे सबसे ढेर १२९ जनहनमे, अप्रिलमे २५, मैई महिनामे २२, जुन महिनामे २६ ओ जुलाई महिनामे ४९ जनहनमे डेंगु डेखा परल स्वास्थ्य निर्देशनालयके तथ्यांकसे डेखाइठ । डेंगुु रोग क्लासिक डेंगु, हेमोरेजिक ओ साक सिन्ड्रोम करके तीन मेरिक रहठै । क्लासिक डेंगू सामान्य प्रकारके डेंगु हो । यी अपनही निको हुइठ, मृत्युके सम्भावना कम रहठ । मने यदि कौनो व्यक्तिहे डेंगू हेमोरेजिक ज्वरो वा डेंगू साक सिन्ड्रोम हुइल बा कलेसे यकर उचित मेरिक उपचार नइकरलेसे मृत्यु हुई सेकठ ।
देशभर जुलाई महिनासम ४ हजार ६१९ जनहनमे डेंगु रोगके संक्रमण डेखल परल रहे । सबसे ढेर कोशी प्रदेशमे २ हजार ९७१ जनहनमे, बागमति प्रदेशमे ७ सय ६७ जनहनमे, गण्डकीमे ३ सय ४७ जनहनमे, सुदूरपश्चिम प्रदेशमे ३ सय १८ जनहनमे संक्रमण डेखल बा । ओस्टेक करके लुम्बिनी प्रदेशमे १ सय ६८, मधेश प्रदेशमे २५ ओ कर्णालीमे २३ जनहनमे केल डेंगु रोगके संक्रमण डेखल बा । मुलुकके टप १० जिल्ला सुनसरीमे २ हजार ७३७, धादिङमे ४ सय ८३, कास्कीमे २ सय ८, दार्चुुलामे १९० जनहनमे डेंगुरोगके संक्रमण डेखल बा । ओस्टेक काठमाण्डौ ८८, संखुवासभामे ७५, म्याग्दीमे ५४, कञ्चनपुरमे ५२, रुपेन्देही ४५, झापामे ४२ जनहनमे डेंगु रोगके संक्तमण डेखल बा । डेगु नियन्त्रणके कैलालीके १३ पालिका मन्से कुछ पालिका डेंगु नियन्त्रण कैना लार्भा खोज ओ नष्ट कर अभियान सुरु करले बटै । कलेसे बहुट जैसिन पालामे यी अभियानके सुरुवाट नइहुइल हो । डेगु नियन्त्रणके लाग सुदूरपश्चिम प्रदेश स्वास्थ्य निर्देशनालयसे लेके स्वास्थ्य कार्यालय अभियानहे तिब्र बनैटी रोग नियन्त्रणमे ध्यान डेना जरुरी बा ।