‘लम्पी स्किन’ रोग विरुद्धके खोप हाली व्यवस्था करी

सुदूरपश्चिम प्रदेशमे ३ लाख १० हजार पशु चौपाया ‘लम्पी स्किन’से संक्रमित हुइल बटै । यी रोगसे करिब २५ हजार पशु चौपाया मरलपाछे सुदूरपश्चिमके किसान भारी क्षति बेहोरे परल बा । भेटेरिनरी अस्पताल तथा पशुसेवा विज्ञ केन्द्र कैलालीके अनुसार यी प्रदेशमे लाखौ पशु चौपायामे ‘लम्पी स्किन’से संक्रमण फैलल बा । दुहुना भैँसीनिय ओ गैया लम्पी स्किन रोगसे मरे लागलपाछे किसानके दैनिक आम्दानी बन्द हुइल लागल बा । खोप लगाइक लाग केल कैलालीमे दुई लाख डोज आवश्यक बा । कलेसे बाँकी ८ जिल्लामेफे १६ लाख खोपके डोज खरिद कैना ३२ करोड आवश्यक बा । नेपाल पाराभेटेरिनरी एण्ड लाईभस्टक एशोसिएशन प्रदेश कार्य समितिसे सुदुरपश्चिम प्रदेशके मुख्यमन्त्री कार्यालयमे लम्पी स्किन रोगसे भयावह बन्टी गैल ओरसे महमारीके अवस्थाहे मध्यनजर करटी संकटकाल घोषणा करे पर्ना माग करल रहे ।

लम्पी स्किन रोग नियन्त्रणके लाग ठोस योजनाके साथ आवश्यक औषधी तथा खोपके व्यवस्था करपर्ना, लम्पी स्किन रोग नियन्त्रण उपचारके लाग पशु चिकित्सक प्राविधिक सशक्त रुपमे परिचालन करपर्ना, लम्पी स्किन रोग नियन्त्रण उपचारके लाग प्रयोग हुइना औषधीके बजारमे अभाव रहल ओरसे आवश्यक औषधी उपलब्धता बढाई पर्ना, बिमा करल पशुहुकनके बिमा बापतके क्षतिपुर्ति उपलब्ध कराई व लम्पी स्किन रोगसे मृत्यु हुइल पशु पत्यक्ष रुपमे प्रभावित हुइक कृषक ÷ व्यवसायीहुकनहे राहतके कार्यक्रम नाने पर्ना आवश्यक बा । लम्पी स्किन रोग लागल गैया÷भैँसीनियामे जुरी अइना ओ शरीरके टमान भाग तथा भिटर तहमे गाँठागुठी विल्गैना, गाँठागुठीसे पानी बग्न ओ पक्ना, पशु छटपटैना, दुब्लैटी जैना, गोर खोच्यइना, दूध उत्पादन घट्न लगायत लक्षण डेखा पर्ना परल बा ।

खोपसे संक्रमण रोके सेक्ना हुइलेसेफे सुदूरपश्चिममे पर्याप्त खोप नइरहल पशुचिकित्सके गुनासो बा । सही उपचार ओ संक्रमण फैल्ना आघे खोप डेहे नइसेक्के पहाडी जिल्लामे ढेर पशु मरल बटै । सुदूरपश्चिम प्रदेश सरकारसे रोग नियन्त्रणके लाग पशु चौपायाहे लगैना खोपके लाग संघीय सरकारसंग समन्वय करके पीडित किसानहे राहत ओ सहुलियतके कार्यक्रम नन्ना आवश्यक बा ।