चार पालिकाके न्यायिक समितिविच अनुभव अदानप्रदान

पहुरा समाचारदाता
हसुलिया, १८ सावन । कैलाली जिल्लाके चार पालिकाके न्यायिक समितिविच अनुभव अदानप्रदान कैगिल बा ।

विफेक रोज कैलारी गाउँपालिका, भजनी नगररपालिका जानकी गाउँपालिका ओ जोशीपुर गाउँपालिकाके न्यायिक समितिविच एक बर्षके दौरानमे न्यायिक समितिसे कैगिल कामके अनुभव अदानप्रदान कैगिल हो ।

कैलारी गाउँपालिकाके उपाध्यक्ष तथा न्यायिक समिति संयोजक भगवतीकुमारी चौधरी औरे पालिकासे अनुभव साटासाटके क्रममे कैलारीमे आर्थिक २०७९÷८० सालमे ६४ ठो मुद्दा दर्ता हुइल जानकारी करैले बटी । न्यायिक समितिमे साँध सिमाना, लेनडेनाके मुद्दा ढेर आइल बटैली । उहाँ कहली, गाउँमे विवादके मुद्दा परलपाछे विपक्षके मनै नइआइल कारण समाधान कैना समय लग्ना करल बटैली । समितिमे गोसिया गोसिनीया विचके झगडा, लैंगिक हिंसाके घटना कम आइल बटैली ।

भजनी नगररपालिकाके नगर उपप्रमुख तथा न्यायिक समिति संयोजक राजु तिरुवाफे भजनी नगरपालिकामे साँध सिमाना, लेनडेनाके मुद्दा ढेर आइल बटैली । उहाँ कहली, मुद्दा दर्तापाछे विपक्षी झिकैना कर्रा हुइल अनुभव सुनैली । न्यायिक समितिहे निर्णय कैना अधिकार नइडेहल मने मेलमिलाप कैना अधिकार डेहल बटैली । मुद्दा दर्ता हुइलपाछे विपक्षी नइआइलपाछे प्रशासनके सहयोग लेहे पर्ना अवस्थामे आइल संयोजक तिरुवा बटैली ।

जानकी गाउँपालिकाके उपाध्यक्ष तथा न्यायिक समिति संयोजक लालमति कठरिया जानकीमे आर्थिक २०७९÷८० सालमे ४४ मुद्दा दर्ता हुइलमे २४ ठो मुद्दा मिलान हुइल बटैली । कैलारी ओ भजनी जस्टे यहाँफे साँध सिमाना, लेनडेनाके मुद्दा ढेर आइल बटैली । जानकी गाउँपालिकामे अपन पालासे सिस्टम बैठाइल कारण मुद्दा दर्ता ओ फैसला कैना सहजुल हुइल उहाँ अनुभव सुनैली ।

ओस्टेक करके जोशीपुर गाउँपालिकाके उपाध्यक्ष तथा न्यायिक समिति संयोजक रेखाकुमारी कठरिया जोशीपुरमे आर्थिक २०७९÷८० सालमे ६४ मुद्दा दर्ता हुइलमे ३८ ठो मुद्दा समाधान करल बटैली ।

कैलारी गाउँपालिकासे विफेक रोज भजनीमे कैगिल भ्रमण, अवलोकन तथा अनुभव साटासाट कार्यक्रममे कैलारी पालिकाके न्यायिक समिति संयोजक भगवतीकुमारी चौधरी, समितिके सदस्य हरिदवारी चौधरी, न्यायिक समितिके कर्मचारी अनिल चौधरी, रामकृष्ण चौधरी, भजनी नगरपालिकाके नगर प्रमुख केवल चौधरी, भजनी नगरपालिकाके न्यायिक समिति संयोजक राजु तिरुवा, समितिके सदस्य सदस्य गंगाराम चौधरी, उजुरी प्रशासक पूर्णप्रसाद जोशी, नगररपालिकाके प्रवक्ता विक्रम चौधरी लगायतविच छलफल हुइल रहे ।

ओस्टेक जानकीमे हुइल छलफल कार्यक्रममे न्यायिक समिति संयोजक लालमति कठरिया, कानून मामिला ईकाईके खेमबहादुर कठरिया, समिति सदस्य केसन्ती चौधरी, खगेन्द्रबहादुर विश्वकर्मालगागतके सहभागिता रहे । ओस्टेक जोशीपुर गाउँपालिकामे हुइल छलफल कार्यक्रममे गाउँपालिका उपाध्यक्ष तथा न्यायिक समिति संयोजक रेखाकुमारी कठरिया, समितिके सदस्य रामबहादुर चौधरी, सुमित्रा चौधरी, उजुरी प्रशासक अमृता चौधरीलगायतके सहभागिता रहे