सुनहराताल आविके नव निर्मित भवनके उदघाटन
पहुरा समाचारदातात
हसुलिया, १९ सावन । कैलारी गाउँपालिका वडा नम्बर ५ स्थित सुनहराताल आधारभूत विद्यालयके नवनिर्मित भवनके उदघाटन एक समारोहके विचल कैगिल बा ।
राष्ट्रपति शैक्षिक सुधारके २२ लाख ५० हजार ओ कैलारी गाउँपालिकाके ५ लाख करके २७ लाख ५० हजार रुप्यामे निर्माणमे निर्माण सम्पन्न हुइल उ लौव भवन उदघाटन समारोह कार्यक्रमके वडका पहुना कैलारी गाउँपालिकाके उपाध्यक्ष भगवतीकुमारी चौधरी करल रहिट ।
कार्यक्रममे बोल्टी देशमे विकासके लाग शिक्षामे लगानी आवश्यक रहल बटैली । अब्बे शैक्षिक गुणस्तर खस्कटी गैल सुधार करेक लाग शिक्षकसंगे अभिभावाकफे सचेत हुइना जरुरी रहल उहाँ बटैली ।
विद्यालय भवन उदघाटन कार्यक्रममे विशिष्ट पहुना कैलारी गाउँपालिकाके योजना शाखाके प्रमुख सन्तोषकुमार चौधरी, वडा नम्बर ५ के वडा अध्यक्ष विष्णु प्रसाद चौधरी, शिक्षक व्यवस्थापन समितिके अध्यक्ष रामशरण सिंह चुहका, विद्यालयके प्रअ महेन्द्र चौधरी लगायतसे मन्तव्य व्यक्त करल रहिट ।
विद्यालय व्यवस्थापन समिति अध्यक्ष जन्तीराम चौधरीके घरगोस्यामे हुइल कार्यक्रमके संचालन विद्यालयके शिक्षक प्रेम चौधरी ओ स्वागत मन्तव्य शिक्षक भागीराम महतो करल रहिट । कार्यक्रममे वडा नम्बर ५ के वडा सदस्य, शिक्षक, अभिभावक, बृद्धिजीविहुकनके सहभागिता रहल रहे ।
