प्रदेश बालबालिका ऐन २०७७ के समिक्षा ओ सुझाव संकलन

पहुरा समाचारदाता
धनगढी, २० सावन । सुदूरपश्चिम प्रदेशमे बनल प्रदेश बालबालिका सम्बन्धी ऐन २०७७ के समिक्षा ओ उहीहे थप सशक्त बनाइक लाग सरोकारवाला निकायसे सुझाव संकलन तथा छलफल कैगिल बा ।

खप्तड रिसर्च एण्ड डेभलपमेन्ट सेन्टर प्रालिके आयोजनामे सुदूरपश्चिम प्रदेश सभा सामाजिक विकास समितिसंगके समन्वय ओ सहकार्यमे यूएनडिपी÷संसद सहयोग कार्यक्रम अन्र्तगत शुकके रोज सरोकारवाला निकायसे सुझाव संकलन कैगिल हो ।
कार्यक्रममे सुदूरपश्चिम प्रदेश सरकारके मुख्य न्यायधिवक्ता कुलानन्द उपाध्याय प्रदेश बालबालिका सम्बन्धी व्यवस्था कैना बनल विधेयक, २०७७ बारे प्रस्तुतीकरण करल रहिट । ओस्टेक खप्तड रिसर्च एण्ड डेभलपमेन्ट सेन्टर प्रालिके प्रबन्धक निर्देशक झंकर बहादुर कुवँर ऐनबारे थप सहजीकरण करल रहिट ।

सुदूरपश्चिम प्रदेश सभा सामाजिक विकास समितिके सदस्य प्रकाश बहादुर बम, धर्मराज पाठक, तुल्सी देवकोटा, जानकी ऐर बम, ललिता सुनारलगायतसे सरोकारवालासे डेहल सुझाव अनुसार आघे बह्रना प्रतिवद्धता जनैले रहिट ।
पत्रकार मनमोहन स्वाँर फरक क्षमता रहल बालबालिकाके स्वास्थ्य, शिक्षाके अवस्थाबारे जानकारी लेहे नइसेकल ओरसे ऐनके समिक्षा कैना जरुरी रहल बटैलै । प्रदेशमे अभिन ६४ ठो ऐन कानून बनल मने जनजिविकासे सम्बन्धित जम्मा १५÷१६ ठो केल रहल बटैलै । उहाँ कहलै, बनल कानून कार्यान्वयनके अभाव बा । बालबालिका सम्बन्धी ऐन बनल मने कार्यान्वयन नइहुइल हो ।
पत्रकार चित्राङ थापा लागु औषध दुव्र्यसनीमे २० बरस टरेक यूवा फस्टी गैल ओरसे काल्हके दिनमे सारा यूवा कुलट जैहीकी कना डेखा परल बटैलै । बालबालिकाके लाग प्रदेश कानून बनल मने प्रदेशमे विद्यालयके अवस्था हेरेबेर भर्ना हुइल विद्यार्थीनहे विद्यालय छोरना क्रम बह्रल बटैलै ।

सिविन नेपालके हरिलाल चौधरी बालबालिका सम्बन्धी बनल ऐन कार्यान्वयन नइहुइल बटैलै । प्रदेशमे बालबालिकाके अधिकार तथा हकहित संरक्षण ओ सम्बद्र्धन कैना सामाजिक विकास मन्त्रीके अध्यक्षतामे बालबालिका क्षेत्रमे क्रियाशिल नागरिक समाजके सहभागितामे प्रदेश बालधिकार समिति बन्ना कहल बा । ऐनमे शिक्षा, स्वास्थ्य लगायत बालअधिकारके बाट उल्लेख हुइल मने बालबालिका उ अधिकारसे बञ्चित हुइल उहाँ बटैलै ।

गाउँपालिका महासंघके नवराज उपाध्याय यूवाहुक्रे लागु औषध दुव्र्यसनीमे फस्टी रहल ओरसे सुधारके लाग ऐनमेफे कुछ व्यवस्था करे पर्ना सुझाव डेलै । मुक्तकमैया महिला विकास मञ्चके बजारी चौधरी डाईबाबा नइरहल बालबालिकासे जन्म दर्तासे लेके नागरिकताफे पाई नइसेकल बटैली । गैर सरकारी महासंघ प्रदेश सचिव लोकमान धामी दुर्गम क्षेत्रके बालबालिका शिक्षा, स्वास्थ्य, पोषण लगायतसे मौलिक हकसेफे बञ्चित हुईल बटैलै ।

मुक्तकमैया महिला विकास मञ्चके कौशिला चौधरी फरक क्षमता रहल बालबालिकाके लाग अपाङता मैत्री भवन, साकेतिक शिक्षाके व्यवस्था नइहुइल बटैली । सुदूरपश्चिम समाजके निरङ चौधरी यौनिक तथा लैङिक अल्पसंख्यक बालबालिकाके तथ्यांक सरकारसे लेहे नइसेकल बटैली ।

संसद सहयोग परियोजनाके पार्वती भण्डारी कार्यक्रमके उद्देश्यबारे जानकारी करैले रहिट । कार्यक्रमके सहजीकरण पत्रकार कर्ण शाह करले रहिट ।