धनगढी उपमहानगरसे विद्युतीय सवारी चार्जिङ स्टेशनके स्थापना

पहुरा समाचारदाता
धनगढी, २१ सावन । कैलाली जिल्लाके धनगढी उपमहानगरपालिकासे विद्युतीय सवारी चार्जिङ स्टेशनके स्थापना कैले बा ।

उ चार्जिङ स्टेशन उपमहानगरपालिका कार्यालयके परिसरमे जडान कैगिल बा । धनगढी उपमहानगरपालिकाहे वातावरणमैत्री बनैना उद्देश्यसे विद्युतिय सावरी चार्जिङ स्टेशनके स्थापना करल नगर प्रमुख गोपाल हमाल बटैलै । नगरपालिकासे आबके दिनमे खरिद कैना सवारी साधानफे इलेक्ट्रिक रहनाफे बटैलै । नगरप्रमुख हमाल फुलवारीमेफे विद्युतिय सावरी चार्जिङ स्टेशनके स्थापना करे लागल बटोइल ।

चार्जिङ स्टेशनके उदघाटन आज उपमहानगरपालिकाके उपप्रमुख कन्दकला राना एक कार्यक्रमके बीच करल हुइट । वातावरण प्रदुशन नियन्त्रण कैना विद्युतीय सवारी स्टेशनके स्थापना करल बटोइली । चार्जिङ स्टेशनमे एक सय ४० किलोवाट क्षमताके चार्जर रहल बा ।

चार्जिङ स्टेशनमे हाली चार्ज करे मिल्न ६०–६० किलोवाटके डिसी ओ २२ किलोवाटके एसी चार्जर धारल बा । सवारी साधनके चार्ज करसेकल पाछे ग्राहकसे क्यूआर कोड ओ मोबाइल एपमार्फत बिलके भुक्तानी करे सेक्ना व्यवस्था बा । बिहान ओ रात चार्ज करेबेर १० रुप्या ४४ पैसा प्रतियुनिट, दिनके ८ रुप्या २८ पैसा प्रतियुनिट व रात ११ बजेपाछे ६ रुप्या चार्ज शुल्क तोकल बा । कटरा मिनेटसम वा कटरा रुप्यासमके चार्ज कैना हो उहे अनुसार पैसा काटि वा गाडी चार्ज हुई समय वा पैसा बराबरके चार्जिङ पूरा हुइलपाछ उ गाडी थप चार्ज नइहुई ।