शुद्ध खानेपानीके लाग वायो सेन्ट फिल्टर वितरण
पहुरा समाचारदाता
हसुलिया, २२ सावन । कैलारी गाउँपालिका वडा नम्बर १ डम्मरामे शुद्ध खानेपानीके लाग वायो सेन्ट फिल्टर वितरण कैगिल बा ।
डिसिए नेपाल ओ दलित महिला अधिकार मञ्चसे कैलारी गाउँपालिकामे संचालित आधार परियोजना अन्र्तगत समुहमे आवद्ध महिला सदस्यहुकनहे शुद्ध खानेपानीके लाग वायो सेन्ट फिल्टर वितरण कैगिल हो । कैलारी गाउँपालिकाके उपाध्यक्ष भगवतीकुमारी चौधरीके वडका पहुुना ओ वडा नम्बर १ के वडा अध्यक्ष धोजहरिपाल बोहराके विशिष्ट पहुनामे वनदेवी महिला कृषक समुहके २६ जाने महिला सदस्यहुकनहे शुद्ध खानेपानीके लाग वायो सेन्ट फिल्टर वितरण कैगिल बा । वायो सेन्ट फिल्टर कार्यक्रमके वडका पहुना गाउँपालिका उपाध्यक्ष भगवतीकुमारी चौधरी ओ विशिष्ट पहुना वडा नम्बर १ के वडा अध्यक्ष धोजहरिपाल बोहरा करल रहिट ।
कार्यक्रममे बोल्टी गाउँपालिका उपाध्यक्ष सामान्य नल्काके पानीफे फिल्टर प्रयोग करके खैलेसे पानी जन्य रोगसे बाँचे सेक्ना बटैली । उहाँ कहली खराब पानीके बहुट मेरिक रोग लागठ मने हम्रे जान अजान उहे पानी पिलेठी, वास्ता नइकरल रोगके शिकार हुइ परठ । फिल्टरके पानी पिलेसे ढेर रोगसे बाँचे सेक्जाई ।
वडा अध्यक्ष धोजहरिपाल बोहरा शुद्ध खानेपानीके लाग वायो सेन्ट फिल्टरके प्रयोग जरुरी रहल बटैलै । उहाँ कहलै नल्काके पानी डेखैनामे सफा डेखाइठ मने आर्सेनिक लगायत टमान मेरिक खराबी रहे सेकठ । जिहीसे टाईफाइडा, आउ लगायत टमान रोग लगो सेकठ ।
घर घर गहिरो नल्क डेहे नइसेक्ना अवस्था बा, कम गारल नल्का बा कलेसे फिल्टरके प्रयोग करके पानीहे शुद्ध बनाई सेकना बटैलै । वायो सेन्ट फिल्टरके बारेमे जानकारी दलित महिला अधिकार मञ्चके जेटिए संजय चौधरी डेहल रहिट । उहाँ कहलै जैसिनफे पानी डरले सफा बनाडेहठ । एक फिल्टरके ५४ सय रुप्या परठ । जेम्ने दलित महिला अधिकार मञ्चसे ३५ सय ओ १९ सय समुुहके महिलाहुक्रे व्यहोरले बटै । वनदेवी महिला कृषक समुहके अध्यक्ष भिखनीदेवी चौधरीके अध्यक्षतामे हुइल रहे । कार्यक्रमके संचालन मञ्चके जेटिए राकेश भुल करले रहिट ।
ओस्टेक करके कैलारी गाउँपालिका वडा नम्बर ७ रामपुरमे डिसिए नेपाल ओ दलित महिला अधिकार मञ्चसे कैलारी गाउँपालिकामे संचालित आधार परियोजना अन्र्तगत समुहमे आवद्ध २४ जाने महिला सदस्यहुकनहे शुद्ध खानेपानीके लाग वायो सेन्ट फिल्टर वितरण कैना दलित महिला अधिकार मञ्चके कृषि प्राविधि प्रिति चौधरी बटैली ।
