भजनीमे हजारसे ढेर परिवार विस्थापित
पहुरा समाचारदाता
धनगढी, २५ सावन । कैलालीमे बाढ, डुबानके कारण हजारसे ढेर परिवार विस्थापित हुइल बाटै ।
मंगरसे डुबान बह्रटी गैलपाछे भजनी नगरपालिकाकामे किल करिब हजारसे ढेर परिवार विस्थापित हुइल हुइट । उ नगरपालिका होके बहना मोहना, कान्द्रा, काँढा, पथरैया सक्कु लडियामे बरवार बाढ आइल बा ।
मंगर ओ बुध रात बर्सल बरवार पानी ओ सक्कु लडियामे बाढ आइल ओरसे विस्थापित हुउइयाके संख्या बह्रल भजनीवासी एवम् प्रतिनिधि सभा सदस्य गंगाराम चौधरी बटैलै । “हजारौँ परिवार विस्थापित होसेकल बाटै”, उहाँ कहलै,“बाढ बह्रटी गैल ओरसे इ संख्या आउर बह्रके जाइ सेकी ।” उहाँके अनुसार विस्थापितहुक्रे हुलाकी राजमार्ग, सुरक्षित भवन ओ विद्यालयमे बैठल बाटै । मंगरसे उद्धार कार्यमे जुटल उहाँ बुधके फेन उद्धारके लाग अपने खटल जानकारी डेलै । चौधरी हुलाकी राजमार्गसमेत फुट्ना अवस्थामे रहल बटैलै ।
भजनी नगरपालिकाके नौ वडामे डुबान हुइलेसे फेन वडा नम्बर २, ३, ५, ७ ओ ८ पुरै जलमग्न रहल जनाइल बा । मंगरके मोहना लडियामे बाढ कम हुइल कारण ५ ओ ७ वडाके बासिन्दा कम प्रभावित हुइल रहिट । मने बुधके मोहनासहित सक्कु लडियामे बाढ झन् बह्रल ओरसे विस्थापित हुउइयाके संख्या बह्रटी गैल बा ।
नगर क्षेत्र पुरै जलमग्न हुइल भजनी नगरपालिकाके प्रवक्ता एवम् वडा नम्बर ३ के वडाध्यक्ष विक्रम चौधरी जानकारी डेलै । “आज पूरै बर्बाद हुइल बा”, उहाँ कहलै,“हम्रे उद्धार कार्यमे जुटल बाटी ।” उहाँ बाढ प्रभावितहुक्रनके उद्धारके लाग आह्वान कैटी तत्कालके लाग आवश्यक खाद्यसामग्री ओ पानी वितरण करल बटैलै ।
