अबैध भन्सार छलीके सामान बरामद

पहुरा समाचारदाता
कञ्चनपुर, २७ सावन । कञ्चनपुर जिल्लाके टमान (भिमदत्त न.पा. ६ सुकासाल ओ बेलौरी न.पा. ६ मैनाहा) से अबैध भन्सार छलीके सामान बरामद कैगिल बा ।

भारतसे भन्सार छलिके नानल १ लाख २७ हजार बराबरके लेडिज सुट, साडी, धोती, दाल, सोडा लगायतके सामान शुकके साँझओर प्रहरी गस्ती टोलीसे बेवारिसे अवस्थामे फेला पारके आवश्यक प्रकृया पुरा करके नियन्त्रणमे लेहल हो ।

ओस्टेक करके कैलालीके धनगढी उपमहानगरपालिका २ त्रिनगर ब्यारेल लग्गे अबैध भन्सार छली करके नानल ३२ हजार बराबरके लेडिज सुट, साडी, कस्मेटिक सामान लगायतके सामान शुकके साँझओर प्रहरीगस्ती टोलीसे बेवारिसे अवस्थामे फेला पारके आवश्यक प्रकृया पुरा करके नियन्त्रणमे लेहल हो ।