बैतडी समाजसे आयोजित रक्तदानमे ११८ पिन्ट रगत संकलन
पहुरा समाचारदाता
धनगढी, २७ सावन। बैतडी समाज कैलालीसे आयोजना करल ११ औँ बृहत रक्तदान कार्यक्रममे १ सय १८ पिन्ट रगत संकलन हुइल बा ।
धनगढीके पदमा नर्सिङ कलेजसंगे रहल समाजके सचिवालयके प्रांगगनमे रक्तदान तथा खीर खाने कार्यक्रम कैगिल रक्तदान संयोजक राजबहादुर चन्द जानकारी डेलै ।
बृहत रक्तदान कार्यक्रममे १ सय १८ जाने रक्तदान करल रहिट । जेम्ने १० महिला ओ १ सय ८ जाने पुरुष रक्तदान करल रहिट । बैतडी समाज कैलाली रगतके अभाव हुइल बेला रक्तदान कार्यक्रमके आयोजना करटी आइल बा । समाजसे हरेक वर्ष कम्तीमेफे दुई चो रक्तदान कार्यक्रमके आयोजना करटी आइल बा । यी आघेक १० ठो रक्तदान कार्यक्रममे ९ सय ५ जाने रक्तदाता करले रहिट । ‘रक्तदान जीवनदान’ कना नाराके साथ समाजसे रक्तदान कार्यक्रमके आयोजना करटी आइल समाजके अध्यक्ष मायाप्रकाश भट्ट जानकारी डेलै ।
बैतडी समाज कैलालीसे हरेक वर्ष बैतडीके ग्रामीण ओ दुर्गम भेगमे स्वास्थ्य शिविरकेफे आयोजना करटी आइल बा । यी आघे समाजसे बैतडीके पाटन ओ मेलौलीमे दुई ठो वृहत स्वास्थ्य शिविरके आयोजना सम्पन्न करसेकल बा ।
बैतडीके पाटनमे आयोजना हुइल स्वास्थ्य शिविरमे ३२ सय जाने ओ मेलौलीमे आयोजना करल स्वास्थ्य शिविरमे ५७ सय ६० जाने स्वास्थ्य जाँच करैले रहिट कलेसे अब्बेसम १ हजार २३ जाने रक्तदान करल संयोजक चन्द बटैलै ।
