नेपाल कानुन व्यवसायी परिषद्के ३० औँ वार्षिकोत्सव
पहुरा समाचारदाता
धनगढी, २७ सावन । नेपाल कानुन व्यवसायी परिषद् सुदूरपश्चिमके ३० औँ वार्षिकोत्सव समारोह निम्जल बा ।
कैलाली जिल्ला अदालत बार एसोसिएसनके आयोजनामे शनिच्चरके रोज सुदूरपश्चिम प्रदेश सरकारके मुख्यमन्त्री कमलबहादुर शाहके वडका पहुनामे कार्यक्रम हुइल हो ।
कार्यक्रममे सम्बोधन करटी उहाँ संविधान निर्माण हुइलपाछे संविधानहे बुझ्न सन्दर्भमे स्पष्टताके साथ आघे बह्रे पर्ना बटैलै । विशेष करके मुलुकके नजर सरकारप्रति रहठ’ उहाँ कहलै– ‘कानुन व्यवसायीहे व्यवस्थित ओ निस्पक्ष ढंगसे जैना सहयोग कैना प्रदेश सरकार तयार बा, जनताके विश्वासके भरोसाके रुपमे यी पेसाहे सम्मनित बनाई परठ । अपने हम्रे हातेमालो करटी आघे बह्रबी ।’
कार्यक्रममे आन्तरिक मामिला तथा कानुन मन्त्री शिवराज भट्ट कानूनसे सहि डगर अपनाई पर्नामे जोड डेहल रहिट ।
ओस्टेक करके कार्यक्रममे तीन अधिवक्ताहुकनहे सम्मान कैगिल बा । सम्मानित हुइलमे अधिवक्ता शिवबहादुर केसी, ठक्रबहादुर मल्ल ओ भक्तबहादुर सिंह धामी रहल बटै । ओइनहे कार्यक्रमके वडका पहुना मुख्यमन्त्री कमलबहादुर शाह सम्मान पत्र प्रदान करल रहिट ।
नेपाल कानुन व्यवसायी परिषद् सुदुरपश्चिमके अध्यक्ष प्रकाश पाण्डेके अध्यक्षता कार्यक्रममे नेपाल बार एसोसिएसनके उपाध्यक्ष माधवप्रसाद घिमिरे प्रविधि ईन्टरनेटके सहयोगमे शुभकामना मन्तब्य राखल रहिट ।
कार्यक्रममे सुदुरपश्चिमके कानुन ब्यवसायी, सुरक्षा निकाय, पत्रकार, टमान कार्यलयके प्रमुख एवम् प्रतिनिधीहुकनके उपस्थिती रहे ।
