बाढपीडितके उचित व्यवस्था करी

कैलालीके भजनी नगरपालिकाके २ वडामे केल बाढसे विस्थापित एक हजारसे ढेर घरपरिवार सडकमे बास बैठना बाध्य बटै । चार दिन आघे लगातर तीन दिनके अविरल बर्षासे भजनी नगरपालिका वडा न. ३ ओ ८ अभिन जलमग्न अवस्था बा । घर खेतुवासे पानी नइनिकरल कारण भजनी नगरपालिका वडा न. ३ पकरियापुर, वडा न. ८ खैरा, गौडचौरा, बन्दिया, सोनाफाँटास्थित वाढसे विस्थापित ओ प्रभावित हुलाकी सडकमे टेन्ट टाँगके बैठना बाध्य बटै ।

अब्बे डेंगु मलेरियाके सिजन रहल ओरसे बाढपीडितके बासस्थान जोखिम अवस्थामे रहल बा । बाढ प्रभावित क्षेत्रमे पखाला, आँखी पक्ना, खोखी, ओ छालाके समस्या डेखल भजनी नगरपालिकाके स्वास्थ्य शाखा जनैले बा । बाढ प्रभावित क्षेत्रमे पखलाके विरुवा वितरण करलफे कहले बा । विस्थापितहुक्रे दिनभ पानीमे अपन सामान सारे पर्ना ओरसे फोहोर पानीमे भिजल कारण छालाके समस्या देखल बा । बाढसे विस्थापितहुके सडकमे बाध्य हुइलहुकनके लाग चर्पीके व्यवस्था नइहो । बाढसे विस्थापितहुक्रे खुला ठाँउँमे दिशापिसाव कैना बाध्यता बटै । संस्थासे वितरण करल पानीके बोटल जथाभावि फेकल अवस्था बा । जिहीसे डेगु मच्छरसे फेकल बोटलमे अण्डा पर्ना ओ बच्चा जलमैना हुई सेकठ । विस्थापित हुइल परिवार टेन्टमे बैठेबेर साँप, किराकाँटीनके डर बा । प्रदेश सरकारके मुख्यी मन्त्री कमलबहादुर शाहके टोलीलगाायत प्रदेशके मन्त्री, प्रदेशसभा सदस्य, संघसंस्थाके प्रतिनिधि टमान चो अनुगमन करले बटै । मने उचित व्यवस्था नइहुइलपाछे विस्थापितहुकनसे सरकारहे हेर्ना दुष्टिकोण फरक हुइटी गैल बा ।

ओस्टेक कैलालीके गोदावरी नगरपालिका–४ के बुढीतोलामे सावन २२ गते रात अविरल वर्षापाछे पहिरोके कारण सडक भाँसलपाछे अवरुद्ध भीमदत्त राजमार्ग अभिन सञ्चालनमे आइ नइसेकल हो । सडक भाँसल क्षेत्रमे ढुंगा दारके उठैना प्रयास हुइलेसेफे पानी पर्ना ओ पहिरो गिरना क्रम नइरोकलपाछे सडक खुलैना समस्या हुइल बा । करीब दुई सय मिटर सडक भाँसलपाछे पाँच दिनसे सुदूरपश्चिमके पहाडी जिल्ला ओ तराईके जिल्ला विच यातायात सम्पर्क टुटल बा । टबमारे बाढ, पहिरोके समस्याहे मध्यनजर करटी सुदूरपश्चिम प्रदेश सरकार ठोस नीतिके साथ आघे बह्रना चाही ।