उत्तरप्रदेशके एक कार्यक्रममे उप–प्रमुख राना कहली,– संस्कृति संरक्षण कैना एकजुट हुई परल
पहुरा समाचारदाता
धनगढी, २८ सावन । सुदूरपश्चिम प्रदेशके कञ्चनपुर जिल्ला कृष्णपुर नगरपालिकाके उप–प्रमुख द्रोपती राना नेपाल भारतके रानाथारु संस्कृति कैना एकजुट हुई पर्ना बटैले बटी ।
शनिच्चरके रोज उत्तरप्रदेश भारतके लखिमपुर खिरी थारु क्षेत्रके निझोटा गाउँमे २० बरसपाछे कैगिल तिज उत्सव २०२३ कार्यक्रमके उहाँ उ बाट बत्वाइल हुइट ।
उत्तरप्रदेश भारतके लखिमपुर खिरी ग्राम पंचायत निझोटाके आयोजनामे हुइल कार्यक्रमके वडका रहल उहाँ अपन भाषा संस्कृति बचैना सक्कु रानाथारु लागे पर्ना बटैले बटी । नेपालमे केल नइहुके भारतके रानाथारुसेफे एकजुट हुके संस्कृति संरक्षण करेलेसे हमार पहिचान जोग्ना बटैली । दुनु देशके रानाथारु समुदायके टरहिवार, भाषा, संस्कृति सक्कु मिलठ,’ उहाँ कहली, ‘भाषा, कला, संस्कृति संरक्षणमे दुनु देशके रानाथारु समुदायके मिल्के जाई परल ।
तिज उत्सव २०२३ कार्यक्रम बुद्धिजीवी समाजसेवी स्थानीय ओ पुर्व प्रधान तथा नझोटा गाउँके प्रमुख(पधना) रमा शंकर रानाके अध्यक्षतामे हुइल रहे ।
कार्यक्रममे विशिष्ट पहुना ग्राम पञ्चायत पछली क्षिदियाके प्रधान रामनरेश राना, रानाकला संस्कृति संरक्षण मञ्च बेलाके अध्यक्ष महाविर राना, रानाथारु डटकमके अध्यक्ष नन्दलाल राना, रानाथारुके चर्चित गायिका लक्ष्मी रानालगायतके सहभागिता रहे । यिहे विच ग्रामपञ्च पचपेडाके प्रधान लक्ष्मण रानासे गायिका लक्ष्मी रानाहे सम्मान करल रहिठ ।
