भजनीके बाढ पीडितहुकन राहत सामग्री सहयोग
पहुरा समाचारदाता
धनगढी, २९ सावन । भजनी नगरपालिकाके बाढ प्रभावित पीडित नागरिकहे बालकल्याण संघ, वर्ल्ड भिजन इन्टरनेसनल नेपाल ओ दिगो विकास समाज भजनीसे राहत सामग्री सहयोग करले बा ।
अविरल बर्षाके कारण बाढसे प्रभावित पीडित नागरिकहुकनहे दिगो विकास समाज भजनी, बालकल्याण संघ टीकापुर ओ वर्ल्ड भिजन इन्टरनेसनल नेपालसे १७५० किलो चाउर, २१० किलो दाल, ७० किलो नुन, १४० लिटर खाने तेल सहयोग करले बा ।
भजनी नगरपालिकाकाके नगर प्रवक्ता तथा वडा नं. ३ के वडा अध्यक्ष विक्रम चौधरीहे दिगो विकास समाज भजनीके अध्यक्ष रामबहादुर सुनार खाद्यान्न सामग्री हस्तान्तरण करल रहिट हो ।
राहत हस्तान्तरण कार्यक्रममे निमित्त प्रमुख प्रशासकीय अधिकृत चन्द्रदेव भट्ट, भजनी नगरपालिकाके विपद शाखाके प्रमुख विष्णु न्यौपाने, नेपाल रेडक्रस सोसाइटी भजनी उपशाखाके सभापति रामनारायण चौधरी, कार्यकारी निर्देशक लक्ष्मीदत्त भट्ट, वल्र्ड भिजन इन्टरनेसनल नेपालके ओरसे स्पोंसोरशिप फिल्ड संयोजक मंगल शाह, बाल कल्याण संघ टीकापुरके कार्यक्रम व्यवस्थापक सुगम रेग्मी, दिगो विकास समाजके कार्यक्रम संयोजक सन्तराम चौधरी, अनुगमन तथा मुल्यांकन अधिकृत राजकुमार चौधरी, परियोजना अधिकृत विनोद शाह, कर्मचारी, पत्रकार समेतके उपस्थितिमे राहत हस्तान्तरण करल रहे ।
विशेष करके भजनी वडा नं ३ के बाढसे विस्थापित घर परिवारहे आपतकालीन राहत सहयोग स्वरूप खाद्यान्न सहयोग करल बाल कल्याण संघ टीकापुरके कार्यक्रम व्यवस्थापक सुगम रेग्मी जनैलै । ओस्टेक करके उ बाढसे प्रभावित ओ विस्थापित रहल भजनी नगरपालिकासे संचालित आकस्मिक सुरक्षित भवनमे आश्रय लेटी रहल ४४ जाने बालबालिका तथा गर्भवती महिलाहेफे २२५ किलो चाउर, १८ किलो आयो नुन, २७ किलो दाल ओ ९ लिटर खैना तेल सहयोग करल वल्र्ड भिजन इन्टरनेसनल नेपालके ओरसे मंगल शाह बटैलै ।
यी विपदके घडीमे बालकल्याण संघ टीकापुर, वल्र्ड भिजन इन्टरनेसनल नेपाल ओ दिगो विकास समाजसे वितरण करल राहत सामग्री विस्थापित घरधुरीहे ढेर सहयोग ओ राहत डेना उ ३ संस्था विगतके दिनमेफे विपदके अवस्थामे पहिले सहयोग उहाँहुकनके हुइना करल भजनी नगरपालिका वडा नं. ३ के वडा अध्यक्ष तथा नगरपालिकाके प्रवक्ता विक्रम चौधरी बटैलै । ओस्टेक करके टीकापुर नगरपालिका अन्तर्गतके वडा नं ६ ओ ७ के ६ ठो प्रभावित घरधुरीहेफे राहत सामग्री वितरण करल बा ।
