कैलारीमे दुई जनहनमे डेंगुरोग संक्रमण पुष्टि

पहुरा समाचारदाता
हसुलिया, ३१ सावन । कैलाली जिल्लाके कैलारी गाउँपालिकामे दुई जनहनमे डेंगुरोगके संक्रमण पुष्टि हुइल बा ।

पालिकाके वडा नम्बर ४ ओ ८ मे एक÷एक जनहनमे डेंगुरोग संक्रमण पृष्टि हुइल कैलारी गाउँपालिकाके स्वास्थ्य शाखा प्रमुख नरेशकुमार चौधरी बटैलै । वडा नम्बर ४ के गाउँमे २० बरसके एक जाने पुरुष ओ वडा नम्बर ८ पृथ्वीपुरमे ५५ बरसके महिलाहे डेंगु रोग पुष्टि हुइल उहाँ जनैलै ।

डेगुरोग और वडामेफे फैलल हुई सेकना कहटी जुरीसहित हातगोर बठैना लगायतके लक्षण विल्गैलेसे तुरुन्ते लग्गेक स्वास्थ्य संस्थाममे चेकजाँच करैना उहाँ आग्रह करलै ।

डेंगुरोग नियन्त्रके लाग अपन घर, कार्यालय, बजार वरपर पानी जमे सेक्ना ठाउँके सरसफाइ कैना, डेंगुके लार्भा वृद्धि विकास हुइना ठाउँमे खोज ओ नष्ट कैना अभियान संचालन कैनाफे उहाँ आग्रह करलै ।
उहाँ वडा कार्यालय, आमा समुह, महिला स्वा. स्वयंसेविका, भल्मन्सा, बजार व्यवस्थापन समिति, स्वास्थ्य चौकीसंग समन्वय करके डेंगु रोकथाम तथा नियन्त्रण अभियानमे सहयोग तथा समन्वयके लाग सक्कुनसे अनुरोधफे करले बटै ।