धनगढी उपमहानगरपालिकासे फोहोरहे मोहरमे परिणत कैना प्रयास
पहुरा समाचारदाता
धनगढी, ३२ सावन । कैलालीके धनगढी उपमहानगरपालिकासे फोहोरहे मोहरमे परिणत करेक लाग सूक्ष्म वर्गीकरण केन्द्र सञ्चालन करले बा ।
उपमहानगरपालिकासे सरना नइसरना फोहोरमैलाहे व्यवस्थापनके लाग विफेक रोजसे सूक्ष्म वर्गीकरण केन्द्र सञ्चालनमे ल्यानल हो ।
३१ लाख ५५ हजार रुप्या लगानीमे उपमहानगरपालिकासे वडा नम्बर २ मे संचालन हुइल सूक्ष्म वर्गीकरण केन्दके उदघाटन उपप्रमुख कन्दकला राना एक कार्यक्रमके बीच करल रहिट । नगर क्षेत्रबसे उत्पादन हुइना फोहोरहे अब मोहरमे परिणत कैटी आम्दानी करेक लाग सूक्ष्म वर्गीकरण केन्द संचालनमे ल्यानल उहाँ बटैली ।
नगरपालिकासे सरना फोहोरहे वर्गीकरण केन्द्र लग्गे रहल बायोग्याँस प्लान्टमे प्रयोग करके एलपी ग्याँस ओ मल उत्पादन कैना कार्य यी आघे संचालनमे ल्यानल उप प्रमुख राना बटैली ।
प्लाष्टिक, फलाम–टिन, आल्मुनियम, रबर, जुत्ता, कागज सक्कु अलगअलग वर्गीकरण करके विक्री कैना धनगढी उपमहानगरपालिकाके फोहोरमैला व्यवस्थापन तथा सरसफाई शाखा प्रमुख अशोक अवस्थी जानकारी डेलै ।
