कैलालीमे डेंगु संक्रमण उच्च
एक्के दिनमे १४ जनहनमे पुष्टि, सुदूरपश्चिममे संक्रमित संख्या ४६५ पुगल
पहुरा समाचारदाता
धनगढी, १ भदौ । सुदूरपश्चिम प्रदेशके कैलाली जिल्ला डेंगुरोगके संक्रमण तिब्र गतिमे वृद्धि हुइल सामाजिक विकास मन्त्रालय स्वास्थ्य निर्देशनालय जनैले बा ।
निर्देशनालयसे दैनिक सार्वजनिक कैना रिपोर्ट अनुसार कैलालीमे एक्के दिन १४ जनहनमे डेंगुरोग पुष्टि हुइलक सुदूरपश्चिम प्रदेश सामाजिक विकास मन्त्रालय स्वास्थ्य महाशाखाके प्रमुख नरेन्द्रसिंह कार्की जनैलै । कैलालीमे अगस्ट महिनाके विफेक रोजसमके रिपोर्टमे ३८ जाने डेंगु संक्रमित रहलमे शुकके रिपोर्टमे ह्वाटे बह्रके उ संख्या ५२ पुगलक उहाँ जनैलै ।
अगष्ट महिनासम सुदूरपश्चिम प्रदेशक नौ जिल्लामे ४ सय ६५ जाने डेंगु रोग्हनके संख्या पुग्लकफे उहाँ बटोइल । यी प्रदेशमे गैल महिनाके तुल्नामे डेंगु रोगीके विरामी ह्वाटे बह्रलक महाशाखा प्रमुख कार्की बटैलै । सुदूरपश्चिम प्रदेशम जुलाई महिनाम ५८ जनहनमे डेंगु संक्रमण डेखलमे अगष्ट महिनाके १८ तारेखसम १ सय ३८ जनहनमे संक्रमण पुष्टि हुसेकल निर्देशनालय जनैले बा ।
प्रदेशमे आठ महिनाके संक्रमित संख्या हरेबेर सबसे ढेर दार्चुला जिल्लामे रहल बा । यी जिल्लामे मार्च महिनासे केल १ सय १७ जनहनमे, ओ फेब्रअरीमे ३३ डेखल कारण यहाँ सबसे ढेर डेखल मन्त्रालय जनैले बा । मने अब्बे दार्चुलामे संक्रमणदर घटल बा । जुलाई ओ अगष्टमे यहाँ ३÷३ जाने केल डेंंगु संक्रमित डेखल बटै ।
कैलालीमे संक्रमण बृद्धिदर उच्च हुइटी गैल बा । जुलाई महिनामे १६ जनहमे केल डेखलमे अगष्टमे ५२ करके कुल ७८ जाने संक्रमित पुगल बटै । ओस्टेक कञ्चनपुरमे संक्रमणदरमे बृद्धि हुइल बा । जुलाई महिनामे २३ जनहनमे संक्रमण पुष्टि हुइलमे अगष्टमे २८ जाने पुगल बटै । यी जिल्लामे सन २०२३ मे संक्रमितके संख्या ८५ पुगल बा । अछाममे ५२, बाजुरा १८, डोटी १२, बझाङ ११, डडेल्धुरामे ९ जाने ओ बैतडीमे ६ जाने संक्रमित पुगल निर्देशनालय जनैले बा ।
डेंगु मच्छरके कटाईसे सर्ना रोग हो । यी रोग एडिस एजिप्टाई जातके पोथी मच्छरके कटाईसे सर्ना रोग हो । यी मच्छर ग्रामीण क्षेत्रके तुलनामे शहरी क्षेत्रमे ज्यादा पैठै । पानी जम्ना ठाउँमे टीनके डब्बा, रंगके खाली डब्बा, थोत्रो टायर, अलकत्रा वा मट्टितेलके खाली ड्रम, फुलदानी, गमला, पानीके ट्ंयाकी आदिमे यी अण्डा पारठ । सहरी क्षेत्रमे यैसिन वस्तु पर्याप्तमात्रामे रहल ओरसेफे यी मच्छर सहरमे ढेर हुइना करठ ।
डेंगु एडिस एजेप्टाई ओ एडिस एल्वौपेक्टस नामक मच्छरके कटाईसे हुइना तीव्र भाइरल संक्रमण हो । यी भाइरस डेंगु १, डेंगु २, डेंगु ३ ओ डेंगु ४ करके चार मेरिक रहठै । एडिज मच्छर करिया रंगके रहठै, जेम्ने उज्जर थोप्लाफे विल्गाइठ । यी मच्छर विशेष करके दुपहर कटना करठै । औलो उत्पन्न कैना मच्छर फोहर पानीमे पैना हुइलेसेफे डेंगु सर्ना मच्छर टमान दिनसे हलचल नइहुइल स्वच्छ पानीमे अण्डा परठै ।
डेंगू रोग क्लासिक डेंगु, हेमोरेजिक ओ साक सिन्ड्रोम करके तीन मेरिक रहठै । क्लासिक डेंगु सामान्य प्रकारके डेंगु हो । यी अपनही निको हुइठ, मृत्युके सम्भावना कम रहठ । मने यदि कौनो व्यक्तिहे डेंगु हेमोरेजिक ज्वरो वा डेंगु साक सिन्ड्रोम हुइल बा कलेसे यकर उचित मेरिक उपचार नइकरलेसे मृत्यु हुई सेकठ ।
जुरी घटैना सिटामोल खाई परठ ओ प्रशस्त झोल पदार्थ खाई परठ । मने जुरी घटैना कहिके एस्पीरीन तथा आईबुप्रोफेन भर खाई नइपरठ । डेंगु जुरी विरुद्धके खोप तथा खास उपचार समेत नइहरल ओरसे मच्छरके कटार्ईसे बच्न यी रोगके बचावटके मुख्य उपाय हो ।
