कैलारीके बाल संरक्षण सम्बन्धी पञ्चवर्षिय रणनितिक योजना निर्माण कार्यशाला निम्जल
पहुरा समाचारदाता
धनगढी, १ भदौ । कैलारी गाउँपालिकामे बाल संरक्षण सम्बन्धी पञ्चवर्षिय रणनितिक योजना निर्माणके लाग कैलालीके चिसापानीमे हुइल दुई दिने कार्यशाला शुकके रोज निम्जल बा ।
वल्र्ड भिजन इन्टरनेशनल नेपाल ओ बाल कल्याण संघ टिकापुरके आर्थिक तथा प्राविधिक सहयोगमे कैलारी गाउँपालिकाके आयोजनामे कार्यक्रमके कैगिल हो ।
कार्यशाला कैलारी गाउँपालिकाके उपाध्यक्ष तथा पालिका स्तरीय बाल अधिकार समितिके संयोजक भगवती चौधरीके अध्यक्षता ओ गाउँपालिका अध्यक्ष राजसमझ चौधरीके वडका पहुनामे हुइल रहे ।
कार्यक्रममे एक बरस आघे बालबालिकाहुकनके स्थानीय स्तरमे बालबालिका अवस्था विश्लेषण करल प्रतिवेदन प्रस्तुत कैगिल रहे । प्रतिवेदनमे आइल बालबालिकाके सवाल ओ समस्याके आधारमे न्यूनिकरण उपाय खोज्टी पञ्चवर्षिय रणनितिक योजना तयार कैगिल बा ।
उदघाटन कार्यक्रममे बाल कल्याण संघसे संचालित बाल संरक्षक तथा बाल स्पोन्सरशिप परियोजनाके कार्यक्रम व्यवस्थापक सुगम रेग्मी कार्यशालाके बारेमे प्रकाश पारल रहिट । कार्यक्रममे बाल कल्याण संघके कोषाध्यक्ष धनराज शाही शुभकामना मन्तव्य व्यक्त करल रहिट ।
कैलारी गाउँपालिकाके सामाजिक विकास शाखा प्रमुख यगम कलेलसे संचालन करल कार्यक्रममे सहजीकरण भीम अवस्थी ओ रामप्रसाद दहाल करल रहिट ।
कार्यशालामे गाउँपालिका स्तरीय बाल अधिकार समितिके पदाधिकारी, वडा अध्यक्षहुक्रे, कार्यपालिका सदस्य ओ शिक्षा शाखा प्रमुख गणेश प्रसाद मिश्र लगायत विषयगत शाखाके प्रमुखहुकनके सहभागिता रहे ।
