रानाथारु समुदाय तिज पर्व मनैलै
पहुरा समाचारदाता
कैलाली, २ भदौ । सुदूरपश्चिम प्रदेशके कैलाली ओ कञ्चनपुरमे रहल रानाथारु समुदाय शनिच्चरके रोज तिज पर्व मनैले बटै । महिला डिडीबहिनीयाहुँक्र दिनभर निराहार व्रत बैठके तिज पर्व मनाइल रानाथारु समुदायके बुद्धिजीवी डा. जीवन राना बटैली ।
रानाथारु समुदायके तिज और समुदायक तिजसे फरक रहल उहाँ बटैलै । रानाथारु समुदायके महिला अपन डाडुभैया, भतिज्वक दीर्घायुके कामना कैटी व्रत बैठना चलन रहल उहाँ जनैली ।
रानाथारुके समुदाय तिजमे दर नाइखैठै, पानीफे नइपिके दिनभर व्रत बैठना चलन बा,’ उहाँ कहली, ‘साँझय लडयमे पूजा कैके उहे प्रसादके रूपमे तयार परल सिमही, पुरी, गुलगुला, पकौडा, पपरालगायतके परिकार खैना चलन बा ।’
धनगढी उपमहानगरपालिका–८ धनगढी गाउँके भलमन्सा भज्जी राना अपन गाउँमे तीज उदघाटन चार दिन आघे हुइल बटैलै ।
उदघाटनपाछे महिला डिडीबिहीनीयाहुक्रे तीन चारदिन सावनके डोलामे रमैलै, भल्मन्सा राना कहलै, ॅशनिच्चरके दिनभर निराहार व्रत बैठके साँझय लडियामे जाके व्रतालु महिला सावनके डोला बनाइल प्रयोग कैलक डोरी (मुरी) काटके पुहागैलै ।
उहीहे झुरकी पुहाइल कैहिजाइठ ।’ झुरकी (कुसके गाँठी) बनाके लैजैना चलन बा । भोज हुइल व्रतालु सात गाँठी ओ कुवाँरी लउण्डी पाँच गाँठी बनाके झुरकी पुहाई लैजैना करठै । डाडुभैया व्रतालुहुकनहे आशीर्वादके साथे सेकल दक्षिणाफे डेना चलन रलक भल्मन्सा बटैलै ।
बेल्डाँडी तिज मिलन विशेष संस्कृति कार्यक्रम
कञ्चनपुरके बेल्डाँडी गाउँपालिकामे सिसम् डाडी महिला कृषक समूहके आयोजनामे तिज मिलन विशेष संस्कृति कार्यक्रम सम्पन्न हुइल बा ।
रोशनी रानाके सभाध्यक्षमे हुइल कार्यक्रममे वडका पहुना कञ्चनपुर जिल्लाके क्षेत्र नं १ के ख के प्रदेश सभा सदस्य माननीय दिवान सिंह विष्ट रहल रहिट । कार्यक्रममे बोल्टी उहाँ यी क्षेत्रमे रहल जातजातीके अपने रीतिरिवाज भेषभुषा, पहिरनके महत्व रहल बटैलै । रानाथारु समुदायके पहिरन एक अलग्ग पहिचानके रुपमे रहल ओरसे यिहीहे सुरक्षित रख्न आग्रह करलै उहाँ कहलै, अब्बे भाषा, संस्कृति पहिरन लोप हुइटी जाइटा मोर क्षेत्रसे यी समुदायके भाषा, संस्कृति पहिरन प्रवर्द्धनके सदैव सहयोग रही ।
विशिष्ट पहुना बेल्डाँडी गाउँपालिकाके अध्यक्ष हरीचन्द राना, उपाध्यक्ष शान्ति नाथ, रहल रहिट ।
जिल्ला समन्वय समितिके उपाअध्यक्ष रामकुमारी राना लगायत टमान राजनीतिक दलके प्रमुख, संघ संस्थाके प्रमुखह्कुनहे सहभागिता रहे ।
गायक कलाकार अमर सिंह राना, कुठारि राना, गायिका लक्ष्मी रानाके बेजोड प्रस्तुति रहे कलेसे स्थानीय झाँकीफे प्रस्तुत कैगिल बा ।
लालझाडीमे तिज विशेष कार्यक्रम
कञ्चनपुरके लालझाडी गाउँपालिकामे तिज विशेष कार्यक्रम करले बा ।
आदिवासी जनजाति संघ लालझाडीके आयोजनामे लालझाडी गाउँपालिकाके आर्थिक सहयोगमे सुनौलो भविष्य युवा क्लबके प्रावधिक सहयोगमे उ तिज कार्यक्रम हुइल हो ।
आदिवासी जनजाति संघके अध्यक्ष गोमती रानाके सभाध्यक्ष हुइल कार्यक्रममे वडका पहुना कञ्चनपुर जिल्लाके क्षेत्र नं १ के केन्दीय संघके माननीय तारा लामा तामाङ रहल रहिट । विशिष्ठ पह्नुा लालझाडी गाउँपालिकाके अध्यक्ष निर्मल राना, गाउँपालिकाके उपाध्यक्ष सपना राना चौधरी नेपाल राना थारु समाजके जिल्ला अध्यक्ष प्रेमवती राना, लालझाडी गाउँपालिकाके प्रत्येक वार्डके भल्मन्सा, वार्ड प्रतिनिधि समाजसेवी लगायतके उपस्थिति रहे । कार्यक्रमहे सुनौलो भविष्य युवा क्लवके सदस्य मुना राना सञ्चालन करल रहिट ।
