थारु समुदाय गुरही टिहुवार मनैलै, धनगढीमे गुरहीके मुर्ति शिलान्यास
मुर्ति बनैना सहयोग प्रदेश सरकारकेः मन्त्री धामी
पहुरा समाचारदाता
धनगढी, ४ भदौ । थारु समुदायके सोम्मारके रोज गुरही टिहुवार मनैले बटै । परम्परागत कला, संस्कृति जर्गेना करेक लाग सुदूरपश्चिमसे लेके काठमाण्डौसम सांस्कृतिक कार्यक्रम सामुहिक गुरही अस्रा गैल हो ।
पश्चिम थारु समुदायसे मनैटी आइल गुरही टिहुवार सामुहिक रुपमे अस्राइक लाग कैलालीके धनगढी उपमहानगरपालिकाके गुरही चोकमे भव्यता कार्यक्रमके साथ गुरहीके मृर्तिके शिलान्यास कैगिल बा ।
सुदूरपश्चिम प्रदेश सरकारसे उद्योग पर्यटन वन तथा वातावरण मन्त्री रमेश धामी गुहरीके मृर्तिके शिलान्यास करल रहिट । गुरही कार्यक्रम बोल्टी उहाँ शिलान्यास संग्गे मृर्ति निर्माण प्रक्रिया पुरा कैना प्रदेश सरकारसे कैना प्रतिवद्धता जनैलै । थारु समुदाय बहुट पीडा भोगल कहटी उ पीडामे मलहम पट्टी लगैना सुदूरपश्चिम सरकार तत्पर रनाफे उहाँ बटैलै ।
सुदूरपश्चिम प्रदेशसभा गीता चौधरी समुदायके आवाज सदनमे उठैनामे कन्जुसाई नइकैना बटैली । प्रदेश सभामे थारु समुदायसे प्रतिनिधित्व करुइया थारु सांसदसे हक अधिकार पहिचानके लाग कैना काममे पाछे नइपर्ना बटैली ।
धनगढी उपमहानगरपालिकाके उप प्रमुख कन्दकला रानाथारु कार्यपालिकाके बैठकसे धनगढी–८ हे गुरही चोक कहिके निर्णय करल बटैली । उहाँ थारु समुदायके गुरही टिहुवार प्रकृति पुजकसे जोरल बटैली । थारु समुदायसे पुजापाठ जल, जंगल ओ जमिनसे सरोकार रख्टी आइल बटैली । थारु समुदाय डेंगु मलेरिया, कालाजार पचाके बैठल बटवाइली । तराईके भुमिपुत्र रानाथारु ओ थारु समुदाय बनजंगल तालतलैयाके बचाके धारल बटैली । रोग व्यायी नलागे, किराकाँटी धानमे नलागिट कहिके यी मेरिक टमान टिहुवार मनाइल उप प्रमुख राना बटैली ।
ओस्टेक उहाँ उपमहानगरपालिकासे बडघर÷भल्मन्सा ऐन तयारी अवस्थामे धारल जानकारी डेली । उहाँ भल्मन्साहुकनके लाग कुछ बजेटफे विनियोजना करल जानकारी डेली । भल्मन्साहुक्रे न्यायिक ओ सूचना मुलक काम कैठै । उपमहानगरसे पहिचान ओ संस्कृति झल्कना पोशकके लाग तालिमके लागफे बजेट विनियोजन करल बटैली । गुरही विदा डेना कहटी २०७९ सालमे निर्णय करलफे उहाँ बटैली ।
ओस्टेक करके कार्यक्रममे वडा नम्बर ८ वडा अध्यक्ष जुगराम चौधरी, थारु कल्याणकारिणी सभाके केन्द्रीय सदस्य इन्दु थारु, थारु बुद्धिजिवी होरीलाल , चौधरी ब्रेभिया करियाप्रधान थारुलगायत मन्तव्य व्यक्त करल रहिट । गुरही मुल आयोजक समिति संयोजक उन्नती चौधरीके अध्यक्षतामे हुइल कार्यक्रममे स्वागत मन्तव्य बसन्ती चौधरी ओ संचालन सानु चौधरी करल रहिट ।
ओस्टेक करके कैलालीके घोडाघोडीके सुख्खड, बर्दगोरिया गाउँपालिका–६ पृथ्वीपुर, टिकापुर नगरपालिकाके टिकापुर बजार, लम्की चुहा नगरपालिका, गोदावारी नगरपालिका, जोशीपुर गाउँपालिका, जानकी गाउँपालिका, भजनी नगरपालिकालगायत कञ्चनपुर जिल्लाके टमान ठाउँ ओ काठमाण्डौ बासोबास करटी थारु समुदायसेफे सामुहिक रुपमे गुरही मनैले बटै ।
थारु समुदायके गुरही टिहुवारके अवसरमे कैलालीके १३ स्थानीय तह मध्ये ११ पालिकामे एक दिन स्थानीय विदा डेहल रहे ।
कैलालीके धनगढी उपमहानगरपालिका, कैलारी गाउँपालिका, जानकी गाउँपालिका, टीकापुर नगरपालिका, बर्दगोरिया गाउँपालिका, जोशीपुर गाउँपालिका, लम्कीचुहा नगरपालिका, भजनी नगरपालिका, घोडाघोडी नगरपालिका, गौरीगंगा नगरपालिका, गोदावरी नगरपालिकासे थारु समुदाय गुरही पर्वहे विशेष टिहुवारके रुपमे मनैटी आइल गुरही टिहुवार अवसरमे एक दिन स्थानीय विदा डेहल रहिट ।
गुरही टिहुवारके विदाके लाग सुदूरपश्चिम प्रदेश सरकारके मुख्यमन्त्री कमलबहादुर शाहके ज्ञापनपत्र बुझागिल मने प्रदेश सरकारसे सुनुवाई नइकरलपाछे थारु अगुवाहुक्रे आक्रोश व्यक्त करले बटै । थारु कल्याणी सभाके केन्द्रीय सदस्य इन्दु थारु प्रदेश सरकारके थारु समुदायहे हेर्ना नजरिया फरल रहल बटैली ।
उहाँ कहली, थारु समुदाय परिश्रम करके कैना समुदाय हो मने पहिचानके लाग प्रदेश सरकारके हात जोरे जाई दुखद बाट हो । अइना बरस प्रदेश सरकार सुनुवाई नइकरी कलेसे गुरहीके रोज गुरही चोकसे विशाल ¥यालीके साथ प्रदेश सरकारके मन्त्रालय घेराउ कैना उहाँ चेतावनीफे डेली ।
