संघीयता असफल हुइलेसे देश असफल हुईः मन्त्री धामी
पहुरा समाचारदाता
धनगढी, ९ भदौ । सुदूरपश्चिम प्रदेशके उद्योग, पर्यटन, वन तथा वातावरण मन्त्री रमेशसिंह धामी संघीयता असफल हुइलेसे देश असफल हुइना बटैले बटै । धनगढीमे शनिच्चरके आयोजित कैलाली उद्योग बाणिज्य संघके ४९ औँ साधारण सभाममे बोल्टी मन्त्री धामी यैसिन बटाइल हुइट ।
‘संघीयता हम्रे कार्यान्वयन करे परल’ मन्त्री धामी कहलै ‘संघीयता फेल हुइना कहल यी देश फेल हुइना हो, संविधानके मूल मर्म ओ भावनामे उल्लेख करल छ, संघीयता फेल हुइल कलेसे यी संविधान फे फेल हुई ।’
संघीयताउप्पर टमान प्रश्न करके राजनीति दलहे आलोचित करके उन्मुक्ति नइमिल्न बटैटी उहाँ नीति बनैना ठाउँमे कैसिन मनै पठैले बटी, नीति कार्यान्वयन कैना प्रशासनिक संरचना कैसिन बा कनाफे बुझे पर्नां बटैलै ।
सक्कु जाने एकताबद्ध हुके आघे बह्रे पर्ना बटैटी मन्त्री धामी नयाँ व्यवस्था रहल कारण सक्कु सिख्ना प्रकृयामे रहल बटैलै । ओस्टे मन्त्री धामी सुदूरपश्चिम प्रदेशमे उद्योग मैत्री वातावरण बनैना बटैलै ।
उहाँ कहलै ‘हम्रे नीति तथा कार्यक्रममे सुदूरपश्चिममे उद्योग मैत्री वातावरण बनैना कहले बटी, सुदूरपश्चिममे लगानी करे अइना लगानीकर्ताहे सम्मान कैबी ।’ औधोगिक क्षेत्रमे प्रदेश सरकार सहयोगके लाग तयार रहल उहाँक कहाई रहे ।
कैलाली उद्योग वाणिज्य संघके महासचिव ओमबहादुर विष्ट सञ्चालन करल कार्यक्रम संघके अध्यक्ष पुष्पराज कुँवरके अध्यक्षतामे निम्जल रहे । कार्यक्रममे स्वागत मन्तव्य संघके वरिष्ठ उपाध्यक्ष पुष्करराज ओझा रख्ले रहिट । साधारण सभामे संघके पदाधिकारी, सदस्य, उद्योगी, व्यवसायी लगायतके उपस्थिति रहल रहे ।
