नवजीवन सेवा संघके आयोजनामे विद्यालय अनुगमन
पहुरा समाचारदाता
हसुलिया, १० भदौ । कैलारी गाउँपालिका भिटरके विद्यालयमे शैक्षिक सुधारके लाग नवजीवन सेवासे कैगिल गतिविधिके अनुगमन कैगिल बा ।
कैलारी गाउँपालिकाके उपाध्यक्ष तथा पालिकास्तरीय अनुगमन समिति संयोजक भगवतीकुमारी चौधरीके नेतृत्वमे नवजीवन सेवा संघके आयोजनामे कैलारीके ६ विद्यालयके अनुगमन कैगिल हो । अनुगमन समिति संयोजक भगवतीकुमारी चौधरी नवजीवन सेवाके सहयोगमे विद्यालयमे गतिविधिके अनुगमन कैगिल बटैली ।
कैलारी गाउँपालिका वडा नम्बर १ स्थित दिपेन्द्र माविके अनगुगमन कैगिल बा । यी विद्यालयमे संघके आर्थिक सहयोगमे विद्यालयके गेट निर्माण, बाल विकास कक्षाके लाग वाल पेन्टिङ कैगिल बा । वाल पेन्टिङमे इसिडी कक्षामे अध्ययनरत बालबालिकाके लाग टमान चित्र, वर्णमाला बनागिल बा । जनता आधारभूत विद्यालय मनाउमेफे अनुगमन कैगिल बा । यहाँ भवनमे जैना सिढी अपाङगता मैत्री मनैना सहयोग करल बा । ओस्टे बालविकासके लाग वाल पेन्टिङ कैगिल बा ।
वडा नम्बर ५ स्थित जनकल्याण माविमे खाजा घर अनुगमन कैगिल बा । यी निर्माणके लाग नवजीवन सेवा संघसे सहयोग करल हो । ओस्टेक करके यहाँफे वाल पेन्टिङ, बाह्रखरी कोरगिल बा । वडा नम्बर ५ गोबरैलामे शिव प्राविमे इसिडी कक्षाके बालिकाके लाग कैगिल सहयोगके अनुगमन हुइल बा ।
ओस्टेक करके वडा नम्बर ७ रामपुरमे रहल जनता आधारभूत विद्यालयमे नवजीवन सेवा संघसे खानेपानी टंयाङकी निर्माण धारा निर्माण, वाल पेन्टिङ, बुटकाहुवा प्राविमे चर्पी मर्मत, अपाङगता मैत्री सिढी निर्माण कैगिल बा । अनुगमन करटी गाउँपालिका उपाध्यक्ष भगवतीकुमारी चौधरी नवजीवन सेवा संघसे कैगिल लगानी ओ गतिविधिसे बालविकासके बालबालिकाहुकनहे शिक्षण सिकाईमे टेवा पुगल बटैली ।
अनुगमन कार्यक्रममे कैलारी गाउँपालिकाके सामाजिक विकास शाखा प्रमुख यगम कलेल, शिक्षा शाखा प्रमुख गणेश प्रसाद मिश्र, योजना शाखा प्रमुख सन्तोषकुमार चौधरी, नवजीवन सेवा संघके प्रविन श्रेष्ठ, प्रेम चौधरीलगायतके सहभागिता रहल रहे ।
